O investigador Djamel Rahmani realizou unha tese de doutoramento no que constatou que existe un “gran descoñecemento” sobre as políticas e incentivos para promover o uso de vehículos con combustibles alternativos que provome a Unión Europea. Para a realización de ‘Assesing drivers’ preferences for hybrid vehicles via discrete choice experiments’ contou cunha mostra de 1.016 condutores.
O estudo indica que os condutores españois prefiren os vehículos híbridos aos convencionais “aínda que en termos xerais non están dispostos a pagar a marxe de prezos que existe entre ambas fórmulas”, explica o investigador, que considera “insuficientes” os 1.500 euros do plan Pive. Pese a esto, Rahmani tamén identificou uns subgrupos de condutores ambientalistas que si están dispostos a pagar algo máis polos vehículos híbridos.
Na investigación analizou os factores que impulsan as decisión de compra de vehículos, especialmente aqueles que son claves para preferir os híbridos aos convecionais. Rahmani tivo especial interese nos efectos dos incentivos económicos na adaptación destes novos coches, concluíndo que “van ter un efecto moi limitado a menos que o seu nivel presente se incremente”.
Neste contexto, Rahmani aposta por unhas políticas ambientais “máis agresivas” cos vehículos convencionais. Entre outras medidas, suxire apoiar a opción dos híbridos con outro incentivos, como serían o estacionamento gratis ou a exención do pago de peaxe en autoestradas, combinando con restricións aos vehículos regulares a través de taxas ou limitación do seu uso en cidades.
