A escritora e xornalista Rosa Montero protagonizará este venres o primeiro dunha serie de diálogos virtuais organizados polo Instituto Galego de Física de Altas Enerxías (IGFAE) cuxo obxectivo é explorar a transversalidade das ciencias e as humanidades, así como os seus vasos comunicantes. O encontro, moderado polo investigador do IGFAE José Edelstein, poderá seguirse en directo a través de Youtube e forma parte do programa ArtLAB.
Con motivo do confinamento que limitou ou eliminou as posibilidades de celebrar encontros divulgativos e culturais presenciais, o Instituto Galego de Física de Altas Enerxías (IGFAE) da Universidade de Santiago de Compostela (USC) e a Xunta de Galicia pon en marcha un ciclo de diálogos virtuais entre o seu persoal investigador e figuras do ámbito cultural.
Baixo o título “Transfronteirizas, conversas de arte e ciencia”, este proxecto traerá nos vindeiros meses a figuras coas que exploraremos as interseccións entre a física, a ciencia e a cultura, así como outras reflexións cun enfoque interdisciplinar.
Rosa Montero será a primeira convidada no ciclo, nun encontro que terá lugar este venres 15 de maio ás 20:00 horas, a primeira entrevistada que participará nesta iniciativa. A través da canle de Youtube do IGFAE, o público poderá seguir e participar neste diálogo en directo dirixido polo investigador do IGFAE e profesor da USC José Edelstein.
“Transfronteirizas, conversas de arte e ciencia” insérese dentro do programa ArtLAB do IGFAE, unha iniciativa que pretende tender pontes e fomentar a participación entre a sociedade e a comunidade investigadora a través de distintas expresións artísticas. Súmase así a “Cosmoloxías”, unha exposición de obras cartográficas inspiradas no Universo da artista Irene Dubrovsky, celebrada en marzo de 2019; e á conferencia “Física en concerto coas artes” da física teórica Ágnes Mócsy, impartida durante a II Semana da Ciencia do IGFAE en colaboración co Centro Galego de Arte Contemporánea (CGAC).
Rosa Montero naceu en Madrid e estudou Xornalismo e Psicoloxía. Colaborou con grupos de teatro independente, como Canon ou Tábano, á vez que empezaba a publicar en diversos medios informativos como Fotogramas, Pueblo e Posible. Desde finais de 1976 traballa de maneira exclusiva para o diario El País, no que foi redactora xefa do suplemento dominical. En 1978 gañou o Premio Mundo de Entrevistas, en 1980 o Premio Nacional de Xornalismo para reportaxes e artigos literarios e en 2005 o Premio da Asociación da Prensa de Madrid a toda unha vida profesional. A súa obra abarca relatos, contos e textos xornalísticos, entre eles máis de 2000 entrevistas a personalidades de talla mundial. Entre as súas novelas destacan Tratareite como a unha raíña (1983), A filla do caníbal (1997), A ridícula idea de non volverte a ver (2013), O peso do corazón (2015) e a última, Os tempos do odio (2018). Foi premiada en multitude de ocasións e traducida a máis de 20 idiomas. Ademais, é Doutora Honoris Causa pola Universidade de Puerto Rico, membro de Honra da Universidade de Málaga, e en febreiro de 2019 creouse a “Aula Rosa Montero” na facultade de Xornalismo da Universidade Miguel Hernández de Elche (Alacante).
