O xurado da sétima edición dos premios Tinzaparina, impulsados pola farmacéutica LEOPharma, recoñeceu o traballo dun equipo de doutores do Complexo Hospitalario Universitario de Santiago de Compostela. O traballo, co título, Trombose auricular dereita secundaria a catéter venoso central, acadou o primeiro premio entre os 57 proxectos presentados, recibindo un recoñecemento de 2.000 euros. Foi presentado por Martín Pérez Martelo, e nel tamén colaboraron Javier Álvarez Fernández, María Mateos González, Javier Pumares Pérez, Mar Fuentes Losada e Elena María Brozos Vázquez.
Estes galardóns visibilizan a investigación sobre a relación entre a enfermidade tromboembólica (ETV) e o cancro, así como analizar os seus factores de risco e discutir o tratamento máis adecuado para o paciente. Actualmente, a ETV é a segunda causa de morte nos pacientes oncolóxicos e calcúlase que entre un 20% e un 30% dos episodios de tromboses están asociados ao cáncer. Para combater estes riscos, utilízase, entre outros fármacos, a tinzaparina, nome do galardón recibido polo equipo do CHUS.
Os outros dous premios foron para grupos do Complexo Hospitalario Rexional de Málaga e o Complexo Hospitalario de Navarra. Tamén se concedeu un premio extraordinario sobre a Covid-19 a un estudo do Hospital Universitario Vall d’ Hebron (Barcelona).
O director do Foro de Oncoloxía sobre Trombose, no que se entregaron os premios, o doutor Pedro Pérez Segura, destacou o alto nivel de todos os casos presentados. “Foi tremendamente difícil destacar estes catro magníficos proxectos sobre o resto”.
