A Real Academia Galega de Ciencias (RAGC) e a Axencia Galega de Innovación (GAIN) abren o prazo de inscrición para os Premios á Transferencia de Tecnoloxía en Galicia 2023. O obxectivo destes galardóns é recoñecer casos de éxito, tanto no ámbito investigador como empresarial, de transferencia de coñecemento en Galicia. O prazo para presentar as candidaturas estará aberto ata o 15 de abril e o procedemento deberase realizar por vía telemática.
Tres modalidades
Trátase da novena edición deste certame que convoca, de novo, tres modalidades. A primeira delas é o Premio Francisco Guitián Ojea, que recoñecerá un traballo de investigación aplicada. O galardón está dotado con 6.000 euros e premiará o éxito dun grupo de investigación na creación dunha tecnoloxía aínda non transferida e da que deriven “claras aplicacións” para o desenvolvemento socioeconómico de Galicia. A este premio pode concorrer todo o persoal adscrito a centros de investigación de Galicia, incluídos centros tecnolóxicos.
A segunda modalidade é o Premio Fernando Calvet Prats a un caso de éxito de transferencia de tecnoloxía promovido por un grupo de investigación. Tamén está dotado con 6.000 euros e irá destinado ao equipo creador da tecnoloxía transferida con máis éxito ao sector empresarial. Será válido calquera mecanismo de transferencia dende o grupo á empresa, como a adquisición de patente, o proxecto conxunto ou a creación dunha spin-off, entre outros. A este premio tamén pode concorrer todo o persoal adscrito a centros de investigación de Galicia, incluídos centros tecnolóxicos.
A terceira é última modalidade é o Premio Ricardo Bescansa Martínez a un caso de éxito empresarial de tecnoloxía transferida. Tamén con 6.000 euros, concederáselle a unha empresa que acredite a mellor implantación de tecnoloxía transferida dende un grupo de investigación galego. Igual que no premio anterior, será válido calquera mecanismo de transferencia dende o grupo á empresa. A este galardón poden concorrer empresas galegas ou que teñan o seu centro de traballo en Galicia.
Podes consultar as bases premendo nesta ligazón.
