Galicia xa tiña sona de ‘paraíso’ termal durante a época romana. Hai vestixios daquel tempo en lugares que hoxe conservan a tradición de balneario: Bande, Carballo, Cuntis, Baños de Molgas ou Lugo, entre outros. Unha fama que se conserva hoxe en día, con máis de 300 mananciais espallados polo país. Pero por que hai tantas augas termais aquí?
Estamos asentados sobre un afloramento de rochas metamórficas e ígneas, como o granito, a lousa e os xistos, pouco permeables, polo que a auga non se infiltra nelas. Amais, sobre todo nas provincias de Ourense e Pontevedra, hai numerosas fendas na codia terrestre producidas en anteriores etapas xeolóxicas do planeta que permiten o paso da auga a través delas. Debido a estas fendas e á maior temperatura do interior da Terra, estas augas subterráneas ascenden cara a superficie, erosionando e arrastrando diferentes minerais das rochas coas que se topan e que incorporan en forma de disolución.
Así, dependendo do tipo de composto que arrastren, estas augas teñen unhas determinadas propiedades medicinais. En Galicia, a maior parte das zonas termais caracterízanse por augas bicarbonatadas sódicas, cálcicas ou mixtas, e en moitos casos, sulfuradas. Empréganse para tratar doenzas reumáticas e traumatolóxicas, cutáneas, respiratorias ou nerviosas. En ocasións, recoméndanse como bebida para as afeccións de fígado e estómago.
Por outra banda, nalgúns casos, tamén incorporan elementos como o cloro, o flúor ou o ferro. Estas augas poden ter beneficios, respectivamente, para os ósos e a pel, a carie ou a anemia.
No noso territorio, a gran cantidade de fontes termais permitiu que se desenvolvera unha industria turística e de servizos moi importante nalgunhas zonas do país. Galicia representa unha importante parte do turismo termal en España, con milleiros de visitantes que acoden a mellorar a súa saúde.
Y además porque pertenece a la orogenia hercinica mas antigua que permite el desarrollo de zonas fracturadas profundas?