Xoves 28 Marzo 2024

Os alumnos de Ciencias do Mar da UVigo lanzan o programa divulgativo Live Science!

“Hai moitas actividades interesantes no Live Science!, pero se teño que destacar algunha decantaríame polo curso sobre tartarugas e mamíferos mariños impartido polo CEMMA ou a videoconferencia coa Antártida”, explica Uxía Vázquez, da Delegación de Alumnado da Facultade de Ciencias do Mar e unha das organizadoras da iniciativa de divulgación científica Live Science! posta en marcha hai agora dous anos por un grupo de alumnos e alumnas do centro, que comprende a organización de numerosas actividades: relatorios, exposicións, cursos, visitas guiadas…

O programa, que se desenvolve na súa meirande parte nas instalacións do Edificio de Ciencias Experimentais, arrancou co segundo cuadrimestre cunha visita á Escola Naval de Marín, saída que rexistrou unha grande afluencia, e cunha exposición de malacoloxía que poderá visitarse ata finais deste mes.

Publicidade

As actividades programadas no Live Science! apostan por temáticas relacionadas coa titulación de Ciencias do Mar “que teñan unha visión máis ampla das materias multidisciplinares da mesma”, subliña a responsable da Delegación de Alumnado.Trátase polo tanto dunha iniciativa que ademais de divulgativa é formativa, e que ten por obxecto dar a coñecer os proxectos do persoal investigador do centro e a maneira en que os levan a cabo.

Os participantes falarán por videoconferencia cos científicos galegos na Antártida

Entre as propostas máis destacadas figuran un curso impartido polo CEMMA sobre tartarugas e mamíferos mariños, para o que aínda non hai unha data confirmada. “É unha actividade moi interesante, ademais dunha aposta segura”, subliña Vázquez, posto que xa se realizou na facultade un curso destas características no mes de decembro “e houbo xente que se quedou con ganas de facelo”, subliña. Tamén a videoconferencia coa Antártida, na que intervirán os docentes Jesús Souza, Mariano Lastra e Jesús López, que terá lugar o 23 de febreiro, é outra das actividades estrela. A conexión co continente xeado realízase por segundo ano consecutivo, “e logo do éxito do ano pasado, estamos convencidos de que cumprirá as expectativas”, explica a alumna.

As propostas contemplan tamén relatorios como o que vai impartir esta semana Menchu Comas, profesora de investigación do Consello Superior de Investigacións Científicas, que leva por título Mujeres explorando el océano: una experiencia cercana, actividade que se celebra con motivo do Día Internacional da Muller e da Nena na Ciencia. O día 15 será o turno do profesor Rafael García, da Universidade de Girona, que dará unha conferencia sobre Desarrollo de Tecnología al Servicio de la Exploración Submarina. Unha exposición de cefalópodos prevista para marzo e un concurso de fotografía submarina, con data aínda por confirmar, serán outras das actividades da programación do Live Science! que se estenderá ata finais de maio.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

As cinzas dos lumes de 2017 poden causar alteracións no plancto costeiro da Vigo

O estudo realizado por investigadores do CIM da Universidade de Vigo centra a súa investigación na escorredura posterior ás queimas

Os bioplásticos e polímeros sintéticos teñen realmente capacidade de biodegradación?

O proxecto Polbio nace para determinar se este proceso pode ter algún efecto tóxico en ambientes terrestres e acuáticos

Un método estatístico permite detectar por primeira vez que liñaxes celulares evolucionan máis rápido

O estudo, no que colabora a Universidade de Vigo, axudaría a identificar mutacións con incidencia en enfermidades como o cancro

“O ingreso de mulleres nas carreiras de enxeñería está en declive”

Soledad Torres Guijarro, profesora na UVigo, investiga na actualidade a contaminación acústica nos ecosistemas submarinos e como reducila