O egresado da Facultade de Medicina da USC José Manuel Busto Leis, orixinario de Barro (Pontevedra), obtivo o número 1 do exame MIR (Médico Interno Residente), segundo adianta o portal Redacción Médica, que obtivo acceso aos datos provisionais. O mozo acertou 201 respostas e tivo 24 erros, o que suma unha puntuación de 93,1034. Cun baremo de 3,3654, a puntuación total obtida foi de 101,9231.
Os resultados son provisionais ata o vindeiro 21 de marzo, xa que agora se abre o período de reclamacións para os candidatos ao MIR. O 22 de abril celebrarase o acto de asignación das prazas.
Dous estudantes da USC nos 10 primeiros do FIR
A USC tamén tivo a alumnos entre os 10 primeiros nas probas do FIR, que dan acceso á formación como farmacéuticos internos residentes. Manuel Busto Iglesias, de Cambados (4º) e Alejandro Martínez Pradeda, de Poio, (8º) foron os dous egresados da Facultade de Farmacia compostelá no ‘top 10’.