A Fundación Barrié e a asociación The Exponential Fellowship presentaron durante a mañá deste mércores a primeira edición dun novo programa de bolsas que ofrece a titulados de grao, máster ou doutoramento en disciplinas técnicas —matemáticas, enxeñería informática…—a oportunidade de traballar durante 12-18 meses en start-ups de primeiro nivel de Silicon Valley e Nova York, epicentros do sector da innovación e a tecnoloxía.
Segundo explican os organizadores, trátase dun programa pioneiro en Galicia, tanto polo novo da súa formulación —conectar o talento galego con líderes mundiais en emprendemento tecnolóxico—, como pola carteira de start-ups que participan nel, a rede de mentores que o avalan ou a remuneración, que vai dende os 80.000 aos 150.000 euros brutos anuais.
Na presentación do programa participaron a directora da Fundación Barrié, Carmen Arias; Ignacio Moreno Pubul, presidente da asociación The Exponential Fellowship, bolseiro de posgraduado da Fundación e cofundador da start-up Capchase; e Domènec Melé Casas, vicepresidente da asociación.
Así mesmo, interviu David Bonilla, referente no sector tecnolóxico en España e colaborador de The Exponential Fellowship. David é creador de Manfred, unha das plataformas líderes en conectar talento técnico con start-ups de alto crecemento. Ademais, leva dende 2011 dirixíndose ao sector informático español a través da Bonilista e impulsando a conferencia TRG.
