Máis de 2500 persoas pasaron polos obradoiros de verán do Campus do Mar

Un verán máis, o Campus do Mar volveu levar aos areais galegos o seu programa de divulgación científica co obxectivo de dar a coñecer os segredos dos océanos e as costas, amosar a súa biodiversidade e fomentar os comportamentos sustentables co medio mariño. Ao longo do mes de agosto o programa Mergúllate no Océano percorreu as praias de catro concellos das provincias de Pontevedra e A Coruña. Dende Campus do Mar estiman que a participación superou as 2500 persoas en total, principalmente público familiar.
O percorrido iniciouse na praia de Rodeira, en Cangas, para despois achegarse á Santa Cristina, en Oleiros, Baltar en Portonovo e rematar a pasada fin de semana en Samil. O obxectivo deste laboratorio itinerante de investigación en ciencias e tecnoloxías mariñas é que a cidadanía coñeza o mar en profundidade e para iso poñen á súa disposición sete obradoiros científicos a través dos que descubrir de onde procede o peixe que comemos habitualmente, como se orixinan as ondas do mar, o impacto que teñen as emisións de CO2 na acidificación dos océanos, a orixe da area nas praias ou saber algo máis da biodiversidade das costas galegas.
Podes ler máis desta nova no seguinte enlace: