A poboación envellecida en Galicia aumenta co paso dos anos. Os últimos datos publicados polo Instituto Galego de Estatística (IGE) apuntan que os galegos temos unha idade media de 48. Ferrol ocupa o posto número un en poboación de máis de 64, cunha idade media de 49,50. O índice de envellecemento establece que por cada 100 menores de 20 anos hai sobre 168 persoas de máis de 65. Mentres que en España se toma un indicador por riba do 100%, en Galicia adquírese un 167,3%. O IGE informa que a lonxevidade “segue avanzando” no séxulo XXI e que é un dos temas máis preocupantes na sociedade galega actual. De feito, para 2037 agárdase que Galicia chegue ao 32,4% de poboación envellecida, en comparación do 26% da península.
En 2022 os galegos e galegas maiores de 65 anos representaban o 26,1% do total da poboación, que eran 2.690.464 persoas. Vigo é a que conta con maior poboación, seguida da Coruña, Ourense, Santiago, Lugo e Ferrol. Esta última é a que rexistra maior envellecemento. Detrás de Ferrol atópase a cidade ourensá cunha media de idade de 47,70 anos. Pontevedra é a cidade co indicador máis baixo, con 45,1. O IGE realizou unha medición por sexos e hai varios puntos de diferencia entre eles. Por exemplo, en Galicia a idade media dos homes é de 46,4 anos, mentres que nas mulleres é de 49,5.
Ferrol repite como cidade que supera os indicadores de Galicia no índice de envellecemento, que mide a relación entre a poboación maior de 64 anos e a poboación menor de 20. O seu índice é de 201,6, o que quere dicir que por cada 100 menores de 20 anos hai sobre 200 persoas de 65 ou máis anos. Este indicador aumenta co paso dos anos e o IGE prevé que acaden valores superiores a 251 no ano 2037. Mentres que en 2022 o grupo de 70 a 74 anos representa o 22,2% das persoas maiores de 64, no 2037 pode caer ata o 21,8%. No seu lugar, aumentará o colectivo de 80 a 84, e diminuirá o de 85 anos ou máis ata o 19,6%.
O índice de sobreenvellecemento é o cociente entre o número de persoas con 80 ou máis anos e o número de persoas de 65 ou máis anos. En España radica en 17, mentres que en Galicia tomou en 2022 o valor de 20. Unha das preocupacións que xorde a raíz do envellecemento da poboación é como se incrementa a denominada poboación en idade potencialmente dependente. O índice de “dependencia senil” calcula cantas persoas maiores de 64 anos viven nun territorio por cada 100 persoas en idade activa, entre 15 e 64 anos. “Este indicador en Galicia presenta un incremento continuo nos últimos anos e grandes diferenzas entre ambos os dous sexos”, apunta o IGE.
Esperanza de vida
As enfermidades do sistema circulatorio e os tumores son as principais causas de defunción das persoas de 65 e máis anos en Galicia, cunha media dun 30,5%. Séguenlle os tumores, as enfermidades do sistema respiratorio, os trastornos mentais e do comportamento, as enfermidades infecciosas e parasitarias, as enfermidades do sistema nervioso e dos órganos dos sentidos e as enfermidades do sistema dixestivo. A estancia hospitalaria media das persoas maiores de 64 anos é de 9,7 días, unha unidade similar á española (9,5 días), e é menor para o colectivo de máis de 74 anos.
De media, a unha persoa de 65 anos quédanlle 21,7 anos de vida, catro puntos máis nas mulleres (23,7) que nos homes (19,4). As mulleres de Ourense son as persoas con maior esperanza de vida de toda Galicia, cunha media de 24,1 anos, e as de Lugo as de menor, con 23,4. No gráfico compartido polo IGE obsérvase como dende o 2000 e ata o 2021, a esperanza de vida aumentou dende os 19,4 ata os 21,7 anos.
