O Campus de Ferrol acolle desde hoxe e ata o sábado o XIII Congreso Galego de Estatística e Investigación de Operacións, organizado polo departamento de Matemáticas da Universidade da Coruña a petición da Sociedade Galega para a Promoción da Estatística e a Investigación de Operacións (SGAPEIO).
É a segunda ocasión en que este congreso se celebra en Ferrol, logo dunha edición en 2001, e o obxectivo, como nas anteriores edicións, segue a ser contribuír á divulgación dos avances na teoría, nas aplicacións e na didáctica da Estatística e a Investigación de Operacións.
Esta mañá foi inaugurado o congreso pola vicerreitora do Campus de Ferrol e Responsabilidade Social, Araceli Torres, o alcalde de Ferrol, Jorge Suárez, a presidenta de SGAPEIO, Esther López Vizcaíno, e o presidente do comité organizador e vicerreitor de Política Científica, Investigación e Transferencia da UDC, Salvador Naya. Ao congreso asisten 110 especialistas de diferentes países; ademais de España, acuden estes días a Ferrol expertos procedentes de Portugal, Ecuador ou República Dominicana.
