Non serán precipitacións tan intensas como avanzaban os primeiros modelos, a varios días vista. Pero si é certo que a fin de semana alongada polo festivo do 1 de novembro estará pasada por auga en Galicia. MeteoGalicia xa activou os avisos de nivel amarelo por choiva e vento no oeste do territorio por mor dun río atmosférico, un fenómeno habitual que xera unha “autoestrada” cargada de humidade e auga precipitable conectando o Caribe e Galicia.
“É un fenómeno relativamente habitual, e desta vez semella que, finalmente, vai afectar máis ao norte de Portugal. Os modelos a 10 días falaban de que ía haber unha cantidade de auga moi importante, pero finalmente non será tan intenso. Con todo, si que se activou o aviso amarelo”, explica María Souto, de MeteoGalicia. Souto apunta que o salientable é que “este río atmosférico vai poñer fin a un outubro seco e estable, mais a realidade é que esta situación de precipitacións non deixa de ser a habitual desta época do ano”. Engade ademais que os episodios máis intensos produciranse durante a noite, tanto deste xoves ao venres como de venres a sábado e sábado a domingo.
Pola súa parte, a Axencia Estatal de Meteoroloxía (AEMET) difundiu unha nota informativa este xoves na que fala de “precipitacións xeralizadas na Península e Baleares”. Distingue a AEMET unha fronte fría moi activa que chegará ese venres a Galicia, con precipitacións “fortes e persistentes”. Posteriormente, o sábado e o domingo seguirá a chuvia. “É probable que se acumulen máis de 100-150 litros/metro cúbico ao longo de todo o episodio nalgúns puntos, sobre todo en zonas montañosas”, advirte a axencia.
Pola súa parte, o Instituto Português do Mar e da Atmosfera (IPMA) eleva o aviso ao nivel laranxa por fortes precipitacións na noite do venres ao sábado.
