Fortes nevaradas nas montañas de Lugo e Ourense co paso da fronte Karine, que deixou neve por riba dos 800 metros con acumulacións de máis de cinco centímetros. As imaxes de radar de Meteogalicia amosan os depósitos importantes tanto nos Ancares como no Courel, pero moi especialmente no macizo central ourensán e na zona de Manzaneda.
Karine forma parte dunha sucesións de sistemas frontais atlánticos, asociados a novos centros de presión, que estenden as precipitacións e os ventos fortes a gran parte da Península e a Baleares.
Despois do breve paso de León, borrasca bautizada por MétéoFrance, a fronte Karine, máis activa, fixo que se intensifiquen as precipitacións no cuadrante noroeste da península. Desde as 21 horas do domingo, e ata a medianoite do luns ao martes, a Axencia Galega de Emerxencias activou a alerta laranxa na costa por ondas de ata seis metros en todo o litoral de Galicia, e o nivel é laranxa en toda Galicia, agás no norte da provincia da Coruña e Lugo, por refachos superiores aos 100 km/h.
Respecto ás chuvias, Karine mantén activado o aviso de nivel amarelo por posibles acumulacións de máis de 50 litros por metro cadrado nas provincias de Pontevedra e Ourense.
Xa chegado marzo, con Karine regresa a neve, xa que a cota baixa ata os 600 metros ao longo do luns, debido ao descenso de temperaturas. A previsión obrigou a activar a alerta amarela na montaña de Lugo e Ourense durante todo o luns, xa que se poderán acumular máis de cinco centímetros.
A inestabilidade durará ata o martes, cando se manterán refachos de vento superiores aos 100 quilómetros por hora no litoral e zonas altas.
E aquí podes consultar o Boletín de Avisos Meteorolóxicos de Meteogalicia
