O comité clínico que asesora á Xunta de Galicia na xestión da pandemia provocada pola Covid-19 acordou este martes o establecemento do nivel máximo de restricións nos concellos de Cambados, Vilanova de Arousa, Cualedro e Laza. O territorio destes municipios quedará, por tanto, baixo peche perimetral agás causa xustificada, prohibiranse as reunións con persoas non conviventes e manterase pechada a hostalaría.
Noutros 10 municipios rexerá o nivel alto. Así, na Merca, A Pastoriza, Marín, Gondomar, Salceda de Caselas, Padrón, Mesía, Ribeira, Coristanco e A Laracha. A hostalaría aquí estará pechada no interior, e cunha capacidade máxima do 50% no exterior.
No nivel medio ficarán 26 concellos: Carballeda de Valdeorras, Verea, Muíños, Verín, Xinzo de Limia, Allariz, Toén, Chantada, Meira, Cerdedo-Cotobade, Vilagarcía de Arousa, Soutomaior, Fornelos de Montes, Cangas, O Porriño, Tui, Vigo, Nigrán, Lalín, Silleda, Noia, Melide, Ordes, Carballo, Betanzos e Cambre
No resto dos concellos galegos, 273, estarán vixentes as restricións fixadas no nivel medio baixo.
As medidas entrarán en vigor na medianoite do xoves 6 ao venres 7. Está previsto que o xoves ou o venres a Xunta informe das medidas de prevención contra a Covid-19 unha vez que finalice, o vindeiro domingo, o estado de alarma en todo o territorio estatal.
