Declarada a alerta por seca en Galicia

A prolongada escaseza de precipitacións que vive Galicia, cun dos anos máis secos desde que existen rexistros, provocou finalmente que se active a alerta por seca en amplas zonas do país. Así, a alerta decrétase na totalidade da conca do Miño-Sil, que ocupa arredor da metade do territorio galego, e en seis dos 19 sistemas da bacía Galicia-Costa, á que pertencen o resto de ríos que desembocan no mar e os seus afluentes. Así, o territorio afectado abrangue a gran parte de Galicia, entre elas, varias cidades, como Vigo, A Coruña, Ourense e Lugo.

A bacía Miño-Sil, en alerta, ocupa arredor da metade do territorio galego. Fonte: chminosil.es.
A bacía Miño-Sil, en alerta, ocupa arredor da metade do territorio galego. Fonte: chminosil.es.

Segundo o Plan de Seca publicado en 2013 por Augas de Galicia, éntrase nesta fase ” cando é necesario poñer en marcha medidas de conservación do recurso e de xestión da demanda que permitan o seu mantemento con aplicación das medidas de aforro pertinentes”, É a etapa previa ao estado de emerxencia, que se activa “cando é ineludible a aplicación de medidas excepcionais”.

Publicidade

O presidente da Confederación Hidrográfica Miño-Sil, Francisco Marín, cualifica a situación de “nunca vista” ata o de agora nos ríos da conca, no “ano máis seco da historia” desde que se teñen rexistros. Nunha comparecencia ofrecida á saída da reunion da Oficina Técnica da Seca, Marín destacou que nas zonas non reguladas por encoros, a escaseza de auga é especialmente preocupante: o Miño en Lugo leva un 59% menos de auga que a media desta época, e o Lor, un 69% menos. Na parte alta do Sil, na comarca do Bierzo, a situación tamén é complicada.
Nos encoros, aínda que o nivel non obriga por agora a tomar restriccións severas, o nivel actual é do 44,5%, trece puntos por debaixo da media para esta época do ano, segundo sinalou Francisco Marín, que dirixe o organismo adscrito ao Ministerio de Medio Ambiente.

En Lugo, o Miño leva un 59% menos de auga que o normal

Pola súa parte, Augas de Galicia, que se encarga do seguimento os sistemas hidrográficos da bacía Galicia-Costa, anunciou tamén que a partir do vindeiro venres farase efectiva a alerta por seca en seis dos 19 sistemas. Así o anunciou o director do ente, Roberto Rodríguez, na mañá do martes. As zonas afectadas correspóndense aos sistemas 1 (conca dos ríos Verdugo, Baíña e Lagares), 2 (ríos de Oia e O Rosal), 7 (río Xallas), 8 (río Castro), 11 (río Mero, Arteixo e ría da Coruña) e 12 (río Mandeo e ría de Betanzos). Ademais, segundo informou a Xunta, acordouse realizar tamén un especial seguimento ás bacías do Lérez e do Ulla, que continuarán en situación de prealerta.

A decisión de decretar a alerta na demarcación Galicia-Costa débese tamén aos baixos niveis dos caudais, con valores por debaixo do 50%, sensiblemente menores que os rexistros normais para esta época.

Medidas contra a seca

Segundo subliña a Xunta, entre as medidas que se tomarán están “a intensificación dos controis de caudal, que pasarán a ser semanais, incrementar a coordinación entre as distintas administracións e establecer contactos continuos cos concellos afectados”.

Ademais, segundo sinalou o director de Augas de Galicia, a Xunta tamén poderá tomar “medidas sobre posibles axustes no réxime de explotación dos encoros e dos caudais ecolóxicos dos ríos e proceder á adopción de medidas orientadas á axilización das autorizacións de captacións alternativas que sexan necesarias para paliar posibles efectos da seca nunha determinada poboación”.

Non en tanto, por agora, o abastecemento á poboación está garantido, aínda que Roberto Rodríguez quixo apelar “a facer un uso comedido dos recursos”.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Como afectan as chuvias extremas á contaminación na ría de Arousa?

Un modelo da UDC simula a viaxe dos refugallos ata o mar e estuda como as precipitacións intensas axudan no proceso

Cantos días con máis de 35ºC haberá en Galicia a finais de século? Consúltao neste mapa

A provincia de Ourense, Monforte e os vales do Sil e do Miño, serán os que experimenten un ascenso máis acusado

Cambio climático e incendios: as principais ameazas das bolboretas en Galicia

As especies comúns están a salvo a curto prazo, mais os factores antrópicos supoñen un perigo para a preservación destes artrópodos

A UVigo deseña un modelo para predicir os efectos do cambio climático na biodiversidade

Un equipo da Escola de Enxeñaría Forestal de Pontevedra desenvolve un sistema capaz de propoñer melloras que reduzan o risco de incendios e inundacións