O anticiclón situado no interior de Europa non abondará para frear as borrascas que circulan polo Atlántico e que, tras uns días de certo acougo sobre Galicia, volven con forza, levando a Meteogalicia a decretar avisos amarelos por choivas e fortes ventos para este mércores 17 e xoves 18 de febreiro.
A partir das 18.00 horas deste mércores, toda a metade oeste de Galicia estará en aviso amarelo por choiva, con precipitacións por riba dos 40 litros por metro cadrado. Tamén haberá este aviso para o leste das provincias de Ourense e Lugo. E manterase durante toda a mañá do xoves por fortes chuvieiras en case todo o país.
Bo día! Comezamos con tempo tranquilo, sen chuvia, apenas vento e mesmo sen nubes en moitos lugares. Pero a situación irase complicando e xa pola noite e na madrugada de mañá xoves teremos vento e chuvia forte case en calquera punto, como indica a previsión para as 00h de mañá⚠️. pic.twitter.com/ogFo2bTafQ
— MeteoGalicia (@MeteoGalicia) February 17, 2021
A estes avisos, hai que engadir alerta laranxa localizada na montaña de Ourense entre as 6 e as 9 da mañá deste xoves, cando se esperan refachos de vento por riba dos 100 km/h. No resto do país, haberá aviso amarelo por fortes ventos durante a xornada final do mércores e case todo o xoves, con refachos estimados por riba dos 80 km/h.
O sábado prevese que a fronte continúe moi activa e estacionaria sobre o oeste da Comunidade, traendo un día de chuvias moi persistentes as provincias da Coruña e de Pontevedra. No leste, pola contra, haberá baixa probabilidade de chuvia aínda que con ceos nubrados. O vento soprará do sur forte con refachos moi fortes.
A situación atmosférica en Galicia non estará estabilizada ata comezos da vindeira semana, segundo as previsións de Meteogalicia.
Aquí podes consultar o novo boletín de avisos de Meteogalicia
