As temperaturas mínimas bateron varios récords esta noite en Galicia. Tanto na cidade da Coruña, con 19,2 graos, como no aeroporto de Alvedro (18,2) superouse o valor extremo histórico do periodo 1981-2020. Tamén a estación meteorolóxica no aeroporto de Lavacolla, en Santiago de Compostela, rexistrou a temperatura mínima máis alta nun mes de novembro.
As choivas do domingo e das primeiras horas do luns chegaron en cantidade, pero acompañadas dunha masa de aire morno que deixou unha noite de altas temperaturas, deixando os termómetros en valores máis propios do verán.
Este luns Galicia estará afectada pola chegada dunha fronte fría que traerá chuvias e deixará aire frío ao seu paso, retirando a masa de aire cálido de xornadas anteriores.
Co avance da xornada as chuvias chegarán ao leste, mentres que na franxa atlántica comezarán a abrirse claros. As temperaturas non terán cambios significativos durante o día, cun acusado descenso cara á noite e de madrugada.
