Fumar na rúa ou en lugares públicos estará prohibido en Galicia desde este xoves, sempre que non se poida garantir a distancia de seguridade. A Xunta de Galicia toma esta decisión, anunciada polo presidente galego, Alberto Núñez Feijóo, tras reunirse co comité clínico de expertos que estuda a evolución da epidemia na comunidade.
“Varios membros do comité clínico coinciden en que fumar sen ningunha limitación nunha terraza ou na rúa sen distancia física conleva un risco alto de contaminación e de infección”, explicou o presidente da Xunta. A norma entra en vigor este xoves e afectará a toda Galicia.
Xa o pasado 23 de xullo, a Sociedade Española de Epidemioloxía ( SEE) reclamou que todas as terrazas de bares e restaurantes, praias, espectáculos ao aire libre e coches particulares pasasen a ser espazos sen fume, asegurando que o consumo de tabaco incrementa a posibilidade de contaxio do coronavirus.
Nun comunicado, o Grupo de Traballo de Tabaquismo da Sociedade Española de Epidemiología ( SEE) propuxo ampliar os espazos libres de fume para protexer á poboación do fume do tabaco, advertindo de que o consumo de tabaco en espazos exteriores pon en risco tanto a fumadores como a non fumadores de infectarse da Covid-19.
O tabaco semella agravar os síntomas da Covid-19 pero faltan estudos sobre a súa transmisión
Estas aseveracións contrastan cos informes da Organización Mundial da Saúde, que asegura que non existen evidencias científicas de que o fume do tabaco incremente a transmisión do coronavirus. Si aseguran que o tabaquismo pode agravar a doenza e incrementar o risco de morte entre os infectados.
Así conclúe nun informe técnico no que se analizaron ata 34 estudos realizados ata a data sobre o consumo de tabaco e o novo coronavirus, dos cales 26 eran observacionales e oito metaanálises, aínda que en ningún se analizou o risco de infección ou de hospitalización dos pacientes fumadores. As recomendacións da OMS van por non compartir cigarrillos convencionais nin electrónicos e sobre o risco de levar as mans á boca cando se fuma. Pero non alerta sobre a transmisión do coronavirus, xa que non existen estudos sobre este tema.
En calquera caso, a OMS lembra que deixar de fumar é unha necesidade de saúde pública e persoal, e recomenda abandonar o tabaco porque produce efectos positivos inmediatos.
Pues ponte dé la hostelería ya ke va a perder a un montón de clientes por ésta absurdez