Mikhail Gelfand, especialista en bioinformática do Instituto de Ciencia e Tecnoloxía Skolkovo, ubicado preto de Moscú (Rusia), tomou este xoves a determinación de escribir unha carta aberta ante o ataque bélico do seu país a Ucraína. O texto pode lerse no portal TrV-Nauka, unha web de noticias científicas independente que el axuda a editar.
Segundo informa a revista Science, o científico cancelou a súa conferencia habitual sobre xenómica comparativa para falar co seu alumnado a través de Zoom da situación. Após disto, algúns estudantes acudiron ás manifestacións en protesta. Mentres, Gelfand subía á web unha carta contra a guerra con Ucraína que califica como “un paso cara ningunha parte“. Ao texto xa se adheriron centros de científicos, moitos deles pertencentes á Academia de Ciencias de Rusia, así como xornalistas científicos rusos.
“Nós, científicos e xornalistas científicos rusos, declaramos unha enérxica protesta contra as hostilidades lanzadas polas forzas armadas do noso país no territorio de Ucraína. Este paso fatal provoca enormes perdas humanas e socava os fundamentos do sistema estabelecido de seguridade internacional. A responsabilidade de desencadear unha nova guerra en Europa recae enteiramente en Rusia”, advirte a carta.
Dificultades polo bloqueo
Nunha entrevista concedida a Science, o bioinformático indica que coa carta pretende tres cousas: “En primeiro lugar, demostrar que a comunidade científica rusa non é o mesmo que os dirixentes rusos. Segundo, manifestar aos nosos colegas ucraínos a nosa oposición ao que fai o noso goberno e que facemos o que podemos para detelo. E terceiro, expoñer o mesmo á comunidade internacional coa esperanza de que calquera acción para castigar a Rusia sexa ponderada de tal maneira que non se castigue á mesma xente que se opón ao que se está facendo”.
Neste sentido, o científico manifesta os seus medos a que o bloqueo ao seu país supoña aínda máis dificultades para o seu traballo e o dos seus compañeiros. “É difícil mercar equipos. Coñezo compañeiros que non puideron conseguir máquinas de secuenciación porque se consideran de dobre uso, para fins pacíficos e militares. Os meus compañeiros de facultade que son biólogos experimentais van estar tremendamente afectados. Tamén me preocupan as decisións sobre visados. As accións que se dirixen a individuos ou proxectos individuais deben considerarse caso por caso”, enfatiza.
Pola súa parte, a comunidade científica internacional tamén reaccionou ante esta situación. Un exemplo son as sociedades de matemáticas do Reino Unido, Canadá, Francia, Polonia e Estados Unidos, que xa anunciaron que non participarán no Congreso Internacional de Matemáticos, que está previsto que se celebre en San Petersburgo en xullo.