A última actualización do Dicionario da Real Academia Galega suma un cento de novas voces. O Seminario de Lexicografía da institución traballa permanentemente na revisión e actualización do dicionario en liña. Alén de incorporar palabras que designan distintas realidades, incluídos os neoloxismos, o equipo coordinado polo académico Manuel González atende tamén ao labor de completar familias de palabras, como as incluídas nesta última actualización.
Así, figuran vocábulos que permiten avanzar neste obxectivo: antiincendios, bucinada, descifraxe / desciframento, estudantado, polifacetismo, parafusería, postergación, posvenda, ludoteca, enoteca e viñoteca. Incorpóranse igualmente voces tradicionais como bochinche, eis, naipelo, pataqueiro, -a, poma ou rianxo. Tamén se engaden expresión como a descomán (sinónima de a desmán) e a sabendas de, xunto con outras voces de creación ou popularización máis recente, como autofoto, conurbación, dina, feísmo, surfear e o xentilicio gazano, -a.
Os termos do ámbito da ciencia e da investigación teñen presenza nesta actualización, na que se incorporan voces como audioloxía, bolboretario/xardín de bolboretas, grampositivo, -a e gramnegativo, -a, ademais de galeguística.
Con máis de 58.000 entradas, os membros do Seminario de Lexicografía seguen a engadir palabras segundo as demandas que os usuarios e usuarias fan chegar decote a través da lapela “Axúdanos a mellorar”. Froito deste proceso son algunhas das actualizacións máis recentes, como bolboretario e gazano, -a.
Cal é o seu significado?
Nas voces referidas á ciencia aparecen audioloxía, definida como a ciencia que estuda o oído e os trastornos auditivos, e galeguística, entendida como o estudo científico da lingua, literatura e cultura galegas. Ademais, engádese tamén o termo bolboretario, que designa un espazo onde se crían, estudan ou exhiben bolboretas vivas, xunto co seu sinónimo correspondente, xardín de bolboretas.
Entre as novas incorporacións tamén figuran dous adxectivos relacionados pola práctica: por unha banda, grampositivo, -a, referido a aquelas bacterias ou microorganismos que reteñen a tinguidura de Gram; e, pola outra, gramnegativo, -a, aplicado ás que non reteñen a cor nesta proba de laboratorio que emprega colorantes para diferenciar e clasificar bacterias.
