Xoves 28 Marzo 2024

O Nobel Ben Feringa regresa a Santiago co programa Conciencia

O científico holandés, que recibiu o galardón de Química en 2016, mantén unha colaboración con investigadores do CiQUS

O científico Ben L. Feringa (Barger-Compascuum, Países Baixos, 1951), premio Nobel de Química en 2016 polo deseño e síntese de máquinas moleculares, visitará Galicia dentro de dúas semanas como o novo convidado do programa Conciencia que impulsan a USC e o Consorcio de Santiago. O químico participará o día 7 , ás 16.30 horas, nun encontro con estudantes de secundaria nas instalacións do CiQUS, e o día 8 ofrecerá unha conferencia, co título “O goce do descubrimento“, no auditorio Abanca ás 19 horas (a entrada será de balde, ata completar o aforo).

A visita de Ben Feringa a Santiago de Compostela suporá o seu regreso a unha cidade que xa coñece doutras ocasións, debido a súa colaboración con investigadores do CiQUS que foron discípulos seus, como Fernando López, Diego Peña ou Martín Fañanás. En 2016, pouco antes de recibir o prestixioso premio da Academia sueca, Feringa impartiu en Santiago unha conferencia sobre sistemas moleculares dinámicos.

Publicidade

A conexión galega dos novos premios Nobel de Química

A traxectoria académica de Ben Feringa estivo vinculada na súa maior parte á universidade de Groningen, onde estudou Química e se doutorou en 1978. Despois de traballar algúns anos na petroleira Shell, regresou á universidade en 1984, onde na actualidade é catedrático de Química.

Feringa é un pioneiro no deseño e a síntese de máquinas moleculares, é dicir, moléculas que poden actuar coma máquinas de tamaño nanométrico. Estas nanomáquinas coñecíanse en sistemas biolóxicos, pero era un verdadeiro reto construílas artificialmente. O profesor Feringa demostrou que isto é posible mediante síntese química en disolución, conectando selectivamente átomos e fragmentos moleculares.

O traballo do profesor Feringa no desenvolvemento de motores moleculares unidireccionais, que teñen o tamaño dunha millonésima parte dun milímetro, considérase o traballo clave para o progreso da nanotecnoloxía molecular. Demostrou que estes motores moleculares poden funcionar mentres están conectados a unha superficie e que o seu movemento pode mesmo desprazar obxectos macroscópicos. Tamén deseñou un “nanocoche“, isto é, un composto nanométrico que contén catro motores moleculares coma rodas e que se pode mover sobre unha superficie ao ser sometido a un estímulo externo.

A visita de Feringa co programa Conciencia supón a segunda das participacións nesta iniciativa dun dos tres premios Nobel de Química en 2016. O ano pasado foi Jean Pierre Sauvage o convidado. Cabe subliñar que o outro galardoado, Fraser Stoddart, mantén tamén colaboracións co grupo Quimolmat da UDC, que dirixe Carlos Peinador.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Un equipo galego sinala os lípidos en sangue como biomarcadores de covid persistente

Investigadores do CiQUS ofrece unha nova perspectiva sobre a natureza desta enfermidade e abre a porta a diagnósticos e tratamentos máis específicos

Un equipo con participación galega desenvolve un novo tipo de axente contra o cancro

O composto actúa de maneira potente e selectiva sobre a respiración mitocondrial das células nai do tumor, diminuíndo o seu potencial canceríxeno

Nobel de Física para os pais do estudo dos electróns dentro dos átomos

Os científicos Pierre Agostini, Ferenc Krausz e Anne L'Huillier, galardoados pola Academia de Ciencias de Suecia

A USC desenvolve un novo método para a entrega directa de fármacos no interior celular

O novo nanotransportador é capaz de fusionarse coa membrana plasmática e liberar moléculas bioactivas no citosol