O biólogo e director de cine Arturo Menor, gañador do premio Prismas en 2014 polo seu documental WildMed, o último bosque mediterráneo, visita este sábado A Coruña para presentar o seu novo proxecto transmedia, Barbacana, a pegada do lobo. O documental, enmarcado nun proxecto educativo a través de medios audiovisuais, impresos e dixitais, busca educar ambientalmente a través do cinema. Menor falará na feira BioCultura este sábado 3 de marzo ás 18.30 horas.
Barbacana, a pegada do lobo, rodouse en parte na Estrada, onde os gandeiros contaron a súa experiencia convivindo co lobo, con técnicas de prevención para protexer aos animais domésticos. Baseándose nestas experiencias, Menor ten por obxectivo contribuír á conservación do lobo e fomentar a gandería extensiva.
Na elaboración do documental, Arturo Menor percorreu os montes de Pontevedra, Zamora, León e Palencia recollendo os testemuños dos pastores e gandeiros.
