A empresa tecnolóxica TripleAlpha avanza cara á fase final de desenvolvemento de AlphaChick, unha innovadora plataforma que combina Intelixencia Artificial (IA), análise nutricional avanzada e automatización intelixente para transformar de maneira integral a xestión das explotacións avícolas. A solución, xa nunha etapa moi madura, encamíñase á súa validación final en granxas reais, onde demostrará o seu potencial para mellorar a eficiencia, a sustentabilidade e o benestar animal.
O proxecto aborda un dos grandes desafíos do sector: a xestión dispersa e manual de datos críticos como o consumo de penso, o crecemento das aves, a mortalidade ou os indicadores de saúde. Esta falta de dixitalización limita a análise en tempo real e reduce a capacidade de resposta das explotacións ante incidencias produtivas, sanitarias ou relacionadas coa eficiencia, unha situación aínda habitual en boa parte das granxas.
AlphaChick ofrece unha plataforma cloud unificada que integra datos procedentes de sensores IoT ambientais, dispositivos de análise NIR, formularios web para dixitalizar os rexistros de granxa e sistemas de información internos. Todos estes datos procésanse no contorno de Azure e visualízase nunha aplicación responsive con dashboards baseados en Power BI, o que permite un control continuo e centralizado de todos os parámetros clave de cada lote produtivo.
Un dos elementos máis innovadores do proxecto é a incorporación da tecnoloxía NIR (Near Infrared), que permite analizar de forma inmediata a composición nutricional dos pensos, achegando información en tempo real sobre parámetros como proteína, graxa ou humidade. Esta capacidade é clave para optimizar a alimentación e reducir a dependencia de laboratorios externos, facilitando unha formulación máis precisa e eficiente.
Unha solución personalizada
AlphaChick está deseñada para adaptarse ás necesidades de cada explotación e facilitar a automatización intelixente, permitindo configurar alertas e respostas automáticas ante incidencias, como variacións anómalas no consumo de penso ou incrementos na mortalidade. Este enfoque reduce a supervisión manual e acurta os tempos de reacción.
Este avance supón un paso decisivo no obxectivo de levar AlphaChick ata a súa implantación efectiva no sector, tras unha fase de desenvolvemento na que a plataforma incorporou modelos avanzados de análise de datos e Intelixencia Artificial orientados á mellora da toma de decisións nas explotacións avícolas.
O proxecto está financiado a través do programa IG408M – IA 360, impulsado polo IGAPE (Xunta de Galicia) co apoio dos fondos Next Generation EU e do Plan de Recuperación, Transformación e Resiliencia do Goberno de España. TripleAlpha prevé concluír o desenvolvemento nos próximos meses e facilitar o seu despregamento no sector avícola galego como unha ferramenta clave na súa transición dixital.
