Sábado 2 Marzo 2024

A galega Innopharma aumenta a súa capacidade para o desenvolvemento de fármacos

A Xunta de Galicia dota con cinco millóns de euros a esta plataforma nos últimos tres anos a través do Fondo Europeo de Desenvolvemento Rexional

A Plataforma de descubrimento de fármacos Innopharma, liderada desde o CiMUS da USC polos investigadores Mabel Loza e Ángel Carracedo, incrementou a súa capacidade e competitividade internacional. Este fito foi posible a través da dotación de cinco millóns de euros por parte da Axencia Galega de Innovación (Gain) da Xunta de Galicia nos últimos tres anos a través do Fondo REACT-UE dentro do Programa Operativo FEDER Galicia 2014-2020.

“Con este financiamento, a Plataforma Innopharma poderá continuar cumprindo co seu obxectivo de contribuír a que novos fármacos cheguen aos pacientes, ofrecendo aos grupos de investigación biomédica do Sistema Universitario de Galicia e dos Institutos de Investigación Sanitaria, así como á comunidade científica en xeral o seu apoio na xeración de produtos e servizos orientados á saúde”, indicou Mabel Loza durante a súa intervención no evento de presentación da actualización e ampliación da Plataforma Innopharma.

Publicidade

O acto tivo lugar hoxe no CiMUS coa participación da Vicerreitora de Política Científica da USC, Pilar Bermejo; a directora de Gain, Patricia Argerey, o representante da empresa ABAC Therapeutics, Domingo Gargallo, e os coordinadores deste proxecto, Ángel Carracedo e Mabel Loza.

Plataforma Sostible de Altas Capacidades

Desde a súa creación a plataforma de cribado de fármacos e farmacoxenómica Innopharma incorporou as tecnoloxías máis novas e punteiras, o que permitiu que se acreditase como Plataforma de Altas Capacidades do Consorcio Europeo de Infraestruturas de investigación do ERIC EU-OPENSCREEN. “Os avances tecnolóxicos dos últimos anos fan necesaria a incorporación das distintas tecnoloxías e a dixitalización de procesos para gañar eficiencia no proceso e reducir a xeración de residuos contaminantes”, sinala Mabel Loza.

O financiamento recibido permitiu adquirir e actualizar o equipamento científico-técnico do proxecto; contratar persoal especializado no manexo das novas tecnoloxías e acondicionar as instalacións ao novo equipamento adquirido.

O financiamento permitirá actualizar o equipamento científico-técnico do proxecto: Foto: CiMUS

Loza e Carracedo explican que os fondos recibidos permitiron incorporar metodoloxías e tecnoloxías automatizadas compatibles con tratamento por Big Data, coa finalidade de aumentar a capacidade do sistema de I+D+i galego para o descubrimento temperán e desenvolvemento de fármacos en Galicia e fortalecer así o sistema sanitario galego con infraestruturas necesarias para acelerar este proceso.

Ademais, esta plataforma ERIC de farmacoxenómica da USC permite a captación de proxectos internacionais, así como desempeña un papel relevante no desenvolvemento de tecnoloxías translacionais automatizadas con infraestruturas de investigación de vangarda.

Obxectivo: automatización con infraestruturas e especialistas a medida

No que á adquisición e actualización do equipamento científico-técnico se refire incorporáronse sistemas de dixitalización dos procesos de traballo no laboratorio; sistemas de automatización de xestión de compostos; sistemas de automatización da xestión de placas de ensaio mediante a utilización de tecnoloxías de dispensación por ultrasón e sistemas automatizados de microscopía de alto rendemento. Tamén se adquiriron servidores para a análise e almacenamento de imaxes de microscopía de fluorescencia; novos equipos para a análise do efecto de compostos mediante citometría de fluxo e tecnoloxía de cribado de alto rendemento baseado en espectrometría de masas.

A actualización do equipo de fluorescencia en tempo real para a súa utilización no estudo de cribado sobre cardiomiocitos e neuronas; o equipamento de cuantificación da actividade eléctrica das células e de xenotipado en tempo real de alto rendemento e robotización; os sistemas de refrixeración e de incubación de cultivo celular; a plataforma automatizada para a análise en tempo real do metabolismo celular e a función mitocondria e equipamento adicional para a realización de ensaios secundarios de validación de hits, forman parte tamén das novas incorporacións tecnolóxicas.

A adquisición deste novo equipamento conlevou a incorporación de persoal especializado tanto para a súa posta en marcha como para o seu manexo, a través da contratación dun equipo de sete investigadores e un equipo de catro especialistas en TIC. Ademais, acondicionáronse as instalacións dacordo ás novas necesidades, adaptando os espazos e o mobiliario do laboratorio ao uso dos novos equipos.

Aumentar a competitividade do sector

Ademais de apoiar os equipos de investigación biomédica das universidades de Galicia e institutos de investigación sanitaria na creación de produtos e servizos orientados á saúde, Innopharma busca espertar o interese de empresas tractoras e novos profesionais para xerar emprego cualificado, aumentando a competitividade do sector.

Concretamente, a nova dotación que permite a xestión automatizada de millóns de compostos/fármacos, xa xerou un convenio de colaboración/Unidade Mixta coa compañía ABAC Therapeutics para o cribado de coleccións de compostos co obxectivo de identificar novas moléculas, futuros antimicrobianos, que sexan activas contra as bacterias resistentes, o que constitúe actualmente un dos principais problemas de saúde Global.

Actualmente esta plataforma consta dunha infraestrutura de alto rendemento para o cribado de fármacos, con profesionais altamente especializados, e dunha colección de 60.000 moléculas para o desenvolvemento de proxectos neste ámbito. As súas capacidades propiciaron acordos con decenas de centros de investigación e empresas por todo o mundo.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Un proxecto galego impulsa a sustentabilidade do sistema alimentario a través da IA

O proxecto no que participan USC e UVigo acometerá a crise do sector co apoio do Programa Marco ‘Horizonte Europa’

As mulleres protagonizaron anuncios de banca antes de poder abrir libretas de aforro por si soas

Un estudo da USC analiza os roles femininos nas ilustracións e fotografías utilizadas na publicidade bancaria entre 1949 e 1970 en España

Yolanda Prezado: “Coa protonterapia erradicamos o 83% dos tumores en estudos preclínicos”

A científica galega referente en París incorpórase ao CiMUS para impulsar a investigación en Galicia da terapia con protóns

Gciencia celebra o Día da Lingua Materna cun relatorio sobre a divulgación en galego

A xornalista Laura Filloy abordou a importancia de trasladar o coñecemento científico á sociedade nun acto celebrado no Campus de Lugo da USC