A Real Academia Galega de Ciencias (RAGC), coa colaboración da Axencia Galega de Innovación (GAIN) da Xunta de Galicia, acaba de convocar a quinta edición do premio de Xornalismo Científico, que desde esta edición leva o nome de Celia Brañas, unha das pioneiras na incorporación da muller á investigación científica en Galicia, tal e como recolle a súa reseña biográfica no Álbum da Ciencia.
Á convocatoria poderán presentarse, a título individual ou en equipo, os profesionais que desenvolvan a súa actividade en medios de comunicación de Galicia ou en edicións galegas de medios estatais, e que publicaran traballos de de difusión de investigación científica publicado entre o o 1 xuño de 2019 e o 20 de maio de 2020. Estas pezas, que deben responder aos xéneros da noticia, a crónica ou a reportaxe (quedando excluídas as entrevistas e artigos) deberán ter como tema principal calquera aspecto relacionado coa ciencia desenvolvida en Galicia: achádegos, difusión do labor de grupos ou centros de investigación, posibles aplicacións dos resultados da investigación, casos de éxito de transferencia de resultados ao mercado, etc.
O galardón recoñecerá con 3.000 euros o mellor traballo de difusión da investigación científica publicado entre o o 1 xuño de 2019 e o 20 de maio de 2020 en calquera medio galego (ou edición galega dun medio estatal): diarios dixitais ou en papel, radio ou televisión. A maiores, concederase un accésit de 1.000 euros ao segundo traballo mellor valorado.
Os xornalistas poden presentar ao certame –a título individual ou en equipo– noticias, crónicas ou reportaxes que teñan como tema principal calquera aspecto relacionado coa ciencia desenvolvida en Galicia: achádegos, difusión do labor de grupos ou centros de investigación, posibles aplicacións dos resultados da investigación, casos de éxito de transferencia de resultados ao mercado, etc.
O xurado estará presidido pola Secretaria da RAGC e contará con catro vogais, dous/dúas designados/as por GAIN e dous/dúas designados/as pola RAGC, entre os/as que haberá profesionais de recoñecido prestixio relacionados/as cos ámbitos da comunicación e da divulgación científica.
O proceso de presentación de candidaturas –aberto a partir de mañá– é telemático, a través dun formulario electrónico dispoñible na web da RAGC a partir do 30 de maio e ata o 15 de xuño. Unha vez descargado e cumprimentado, o formulario será enviado por correo electrónico a pxornal@ragc.gal, acompañado da documentación complementaria sinalada nel.
Máis información no portal da Real Academia Galega de Ciencias.
