A Facultade de Ciencias da Educación da Universidade da Coruña acolle entre os días 3 e 5 de novembro, o VI Congreso Mundial do Deporte Escolar, Educación Física e Psicomotricidade, no que participan douscentos profesionais procedentes de Portugal, México, Venezuela, Brasil, Arxelia, República Dominicana, Perú e Italia, ademais de España, e no que se presentarán preto de cen traballos científicos.
A conferencia de apertura, que terá lugar logo da inauguración oficial ás 10:00 horas no salón de actos, será impartida polo catedrático da Universidade de Castilla La Mancha Onofre Contreras, recentemente galardoado polo Consello Superior de Deportes coa medalla ao Mérito Deportivo. A súa conferencia versará sobre “A aprendizaxe dos valores a través do deporte. Ideoloxía e realidade”.
Este congreso está dirixido polo profesor da Facultade Víctor Arufe coa colaboración do Departamento de Didácticas Específicas.
