Os efectos da borrasca atlántica que está a atravesar Galicia deixarán refachos de vento de máis de 130 km/h nas zonas norte do litoral galego. Nomeadamente, localizadas na Coruña e na Mariña lucense. De feito, a situación será similiar no comezo da semana á rexistrada durante a tarde e a noite do domingo, onde na estación de Meteogalicia da Gándara, no municipio coruñés de Vimianzo, alcanzáronse ventos de até 138,6 km/h, mentres que na estación de O Penedo do Galo, na localidade lucense de Viveiro, rexistráronse refachos de 133,2 km/h.
O vento zoará tamén moi forte nas zonas altas do interior e deixará choivas moi intensas e localmente fortes no su leste do territorio. Os ceos estarán nubrados ou cubertos con brumas e néboas en zonas de montaña do sueste ao principio e ao final do día e con algún claro no litoral cantábrico durante as horas centrais.
Tamén, as precipitacións se estenderán de leste a este ao longo do día, serán menos frecuentes no litoral cantábrico e poden ser localmente fortes e persistentes no sur e oeste do país onde, ademais, poden ir acompañadas de tormenta. As temperaturas mínimas irán en aumento e as máximas manteranse sen cambios ou en lixeiro aumento. Os ventos do sur seguirán con intervalos fortes e refachos moi fortes no litoral e en zonas altas do interior.
Alerta laranxa en case todo o litoral
A Dirección Xeral de Emerxencias e Interior da Vicepresidencia Segunda da Xunta mantén activa unha alerta laranxa por vento no leste da provincia da Coruña e na Mariña de Lugo. Segundo a Axencia Estatal de Meteoroloxía (Aemet), o fenómeno meteorolóxico adverso de nivel laranxa comezaba a última hora da tarde deste domingo.
Ante esta situación, a Xunta sinala a importancia de seguir as medidas de protección, como retirar obxectos que poidan caer á rúa desde os tellados, balcóns e xanelas, e evitar pasar preto de edificios en ruínas ou en construción, de árbores, de paneis publicitarios e de obxectos susceptibles de desprazarse co vento. Ademais, desde o domingo tamén se mantén activa unha alerta laranxa por temporal costeiro nas provincias da Coruña e Pontevedra.
