Galicia está ás portas dunha fin de semana marcada pola inestabilidade. Unha borrasca situada ao sur das illas británicas enviará este sábado unha fronte activa que entrará polo noroeste e deixará abundantes precipitacións no litoral atlántico durante a mañá. A masa de aire frío que a acompañará provocará un importante descenso térmico, que se notará máis acusadamente nos valores mínimos. Con todo, este episodio de chuvascos e temperaturas frescas durará pouco: o anticiclón volverá exercer a súa influencia sobre Galicia a partir do domingo.
Máis polo miúdo, este venres Galicia estará nunha situación intermedia entre as altas e as baixas presións. Malia que durante a mañá os ceos estarán nubrados nas provincias atlánticas, que tamén experimentarán chuvias febles, a situación cambiará durante as horas da tarde. Máis alá das brétemas costeiras que prevé Meteogalicia nas Rías Baixas, quedará tempo solleiro e ceo despexado tanto no sur como no leste de Galicia. As temperaturas mantéñense arredor dos 26 graos, salientando Ourense, con 33. As mínimas roldan os 18 graos.
Variabilidade nas temperaturas
O día máis inestable da fin de semana será o sábado, debido á chegada dunha fronte activa que deixará chuvias no litoral atlántico pola mañá. Con todo, conforme avance a xornada irase desprazando cara ao interior, ao tempo que perde intensidade. No que respecta ás temperaturas, o maior descenso nas máximas experimentarao o leste de Galicia. En canto ás cidades galegas, Ourense e Pontevedra rexistrarán os valores máis altos, con 27. O resto quedan arredor dos 24. En canto ás mínimas, quedan nunha media de 16 graos.
O domingo xa volven os ceos despexados e o tempo solleiro, dado que se recuperará a influencia anticiclónica. Un dos aspectos máis salientables da xornada será o acusado descenso térmico nas temperaturas mínimas, que non superarán os 12 graos e que quedarán en tan só 8 na cidade de Lugo. As máximas, pola contra, non experimentarán cambios significativos respecto ao día anterior. Esta situación de estabilidade agárdase para o resto da semana, co anticiclón actuando de novo sobre Galicia.
