O tempo borrascoso non permite unha tregua neste outono. Tras do paso de Amelie, o primeiro temporal que xerou máis dun cento de incidencias por toda Galicia, veñen outras frontes que formarán un tren de sucesivos vagóns que deixarán choiva, vento e avisos amarelos en terra e laranxas no mar ao longo desta semana.
Este luns chega unha nova borrasca. Espérase unha xornada de precipitacións que serán máis intensas durante a segunda metade do día, cando está previsto que cruce a comunidade unha fronte activa. O vento do suroeste soprará con forza na costa, onde a Axencia Estatal de Meteoroloxía activou un aviso laranxa por ondas de sete metros. O litoral máis afectado será o da Costa da Morte e da Mariña Lucense.
Ademais, haberá un baixa das temperaturas coa presenza de neve a partir dos 1.400 metros de altura.
O martes chegarán ventos do noroeste que van favorecer a entrada de aire frío de orixe polar ata Galicia. A presenza dese aire xélido traducirase en saraiba, tormentas e un novo descenso das temperaturas máximas e mínimas.
O mércores o tren de borrascas continuará chegando a Galicia, desta volta dende o sur de Irlanda. Desde aí, a borrasca afectará a Galicia cunha fronte que entrará polo oeste para partir do mediodía. O xoves e venres espéranse precipitacións intermitentes e a fin de semana Galicia quedará baixo a influencia dun novo sistema de baixas presións.
