A provincia de Pontevedra volveu tremer este venres. Un sismo de magnitude 2,8, con epicentro ao sur do concello de Ponte Caldelas, xa preto de Soutomaior, e hipocentro a 12 quilómetros de profundidade, chegou a sentirse no lugar de Rebordelo. Segundo os datos recollidos polo Instituto Geográfico Nacional, houbo testemuños que sentiron o sismo neste lugar, polo que se lle atribuíu unha intensidade II, que na escala se corresponde cos tremores que se perciben “só en casos illados” en “individuos en reposo e en posicións especialmente receptivas dentro de edificios”.
Neste caso, o epicentro tivo lugar máis ao sur da área que concentrou o enxame sísmico fixo tremer a mediados deste mes no municipio de Ponte Caldelas. O máis forte, de magnitude 3,2, aconteceu na madrugada do 17 de maio. A este tremor acompañouno unha serie de máis de 40 sismos. Un fenómeno que desde o IGN atribuíron ao movemento continuo e habitual das placas tectónicas.
Máis sismos en Galicia
Porén, o deste venres non foi o único movemento rexistrado nos últimos días. Os sismógrafos tamén detectaron unha serie de cinco terremotos moi próximos entre si no municipio de Taboada, en Lugo, arredor do cauce do río Miño, tal e como se pode ver na imaxe adxunta. Porén, ningún deles foi sentido pola poboación, xa que as magnitudes oscilaron entre 1,7 e 2.
Tamén na provincia lucense, máis ao norte, en Castro de Rei, tivo lugar este xoves un sismo de magnitude 1,9, que tampouco foi sentido. E na madrugada deste venres, o IGN tamén deu conta doutro tremor da mesma magnitude en Ramirás (Ourense).
Cabe subliñar tamén que o IGN detectou a pasada semana en varias das súas estacións un movemento de magnitude 1,3 producido pola explosión do almacén clandestino de pirotecnia no municipio de Tui.
