Nunha perfecta coreografía atmosférica, Galicia acabará vivindo os efectos da DINA (Depresión Illada en Niveis altos) que este xoves e venres deixa aviso vermello por fortes choivas no litoral mediterráneo. En Valencia, Murcia e Almería, hoxe e mañá hai alerta por fenómenos extremos, con precipitacións torrenciais e con risco para as persoas. Por sorte, cando o domingo chegue ao Noroeste este fenómeno da pinga fría (‘cold drop’, en inglés), aparecerá moi debilitado, aínda que provocará fortes treboadas especialmente durante a tarde.
Polo tanto, a formación da pinga fría no Mediterráneo acabará afectando tamén a Galicia. A fin de semana a DINA tomará dirección noroeste e no seu camiño pola Península descargará choivas en zonas do centro do país como Madrid.
Finalmente, na tarde do domingo esta masa de aire frío en capas altas da atmosfera vai instalarse no sur de Galicia, provocando ‘tormentas importantes’, aínda que moito menos intensas que no Mediterráneo. De feito, ata o de agora non hai avisos nin de Meteogalicia nin da AEMET.
