Únete á nosa canle de Whatsapp
Axentes do Servizo de Protección da Natureza (Seprona) da Garda Civil adscritos ao posto de Corcubión abriron unha investigación contra un veciño da localidade coruñesa de Trazo por un presunto delito de caza non autorizada. O proceso iniciouse a raíz de que axentes medioambientais de Vimianzo puxeran en coñecemento da Garda Civil un vídeo no que se ve como un grupo de varios cazadores rodean o cadáver dun lobo. O caso coñécese meses despois da polémica batida de Friol, que se saldou coa morte dun can.
Cos datos recabados ata o momento, o Seprona confirmou que as imaxes foron gravadas o día 5 de febreiro, durante unha batida autorizada de raposo no municipio de Val do Dubra. O investigado é o suposto autor do disparo mortal. Amais, abriuse unha denuncia administrativa contra un segundo cazador que tamén disparou sobre o lobo.
No mesmo coto, detras dunhas matogueiras, os axentes do Seprona atoparon restos do animal, xa decapitado, polo que todo apunta a que os responsables da morte do animal levaron a cabeza para desecala, segundo as pesquisas da Garda Civil. O caso foi remitido ao Xulgado de Instrucción 3 de Santiago e á Xunta de Galicia, para que este ente tome as medidas administrativas oportunas.
