Venres 29 Marzo 2024

Aparece unha nova balea azul nas costas de Galicia

A terceira balea azul en apenas un mes deixouse ver nas costas galegas este luns. Durante unha xornada de traballo, o Bottlenose Dolphin Research Institute, con base no Grove, atopou un novo exemplar de Balaenoptera musculus. É o terceiro avistamento nun mes despois dos realizados na boca da ría de Muros e Noia e outro a unhas dez millas de Ons.

Os biólogos do BDRI acompañaron á balea e ao resto do ‘séquito’ de rorcuais comúns, golfiños e toniñas durante dúas horas nas inmediacións de Corrubedo. Xunto á xigante azul nadaban outras cinco baleas comúns (Balaenoptera physalus) e preto dun cento de golfiños comúns e toniñas, segundo conta na súa páxina de Facebook o BDRI. É o segundo avistamento desta especie que fai este instituto, despois do realizado en Ons.

Publicidade

Outra das fotografías da terceira balea azul avistada en Galicia. Foto: BDRI.
Outra das fotografías da terceira balea azul avistada en Galicia. Foto: BDRI.

“Foi incrible, non saïamos do noso asombro”, conta Bruno Díaz, director do BDRI. Confirma que este exemplar non é ningún dos dous avistados anteriormente. Engade que “o máis interesante é que o seu comportamento era de alimentación, o que parece indicar que a costa galega se ten convertido nunha especie de avituallamento para a especie”. É dicir, que probablemente non estean de paso.

“É unha barbaridade”

No período transcurrido desde o avistamento do 20 de setembro, os científicos do BDRI contrastaron cos centros de referencia sobre os rexistros de baleas do Atlántico que non se trata de ningún exemplar catalogado anteriormente na costa. “Ábrense novas incógnitas, como se en realidade a costa galega fose un corredor dos cetáceos cara o sur”. Ademais, estes avistamentos poderían adiantar unha recuperación da especie, unha vez instaurada a moratoria na caza de baleas azuis a finais do século XX.

A gran presenza de mamíferos de gran tamaño tamén evidencia a gran actividade biolóxica nas augas da costa galega, toda vez que unha balea azul pode chegar a comer 36 toneladas de krill ao día. “É unha barbaridade; hai unha enorme produtividade, as concentracións de clorofila e plancton son altísimas. Ten que haber unha riqueza enorme para que haxa alimento para todas”.

 

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

A rede ambiental máis grande do mundo declara as rías galegas como área importante de mamíferos mariños

A IUCN destaca o valor da poboación dos cetáceos que viven nas costas de Galicia, especialmente dos golfiños

En que zonas das Rías Baixas hai plásticos flotantes? Este mapa ten a resposta

Un equipo do Grove leva dende 2016 realizando mostraxes na ría de Arousa e nas súas augas circundantes para estudar o lixo mariño en superficie

Queres adoptar un golfiño da ría de Arousa? Así podes facelo

O Bottlenose Dolphin Research Institute BDRI, con sede no Grove, ofrece a posibilidade de apadriñar un exemplar dos 40 que están estudando

As candorcas volverán esta semana a Galicia

Os expertos confirman o avistamento de 'Orcinus orca' á altura de Braga, polo que se prevé a súa entrada nas Rías Baixas nos próximos días