O aviso amarelo para o sur de Galicia pola calor deste venres foi elevado a aviso laranxa por Meteogalicia na conca do río Miño ao seu paso por Ourense, onde as temperaturas deste venres van achegarse aos 40 graos.
Ademais, a situación mudará notablemente na xornada do sábado, cando Meteogalicia activou o aviso amarelo, pero por outro fenómeno meteorolóxico: as treboadas, con tormentas nas provincias de Ourense e Pontevedra con precipitacións por riba dos 15 litros por metro cadrado nunha hora.
O aviso amarelo por altas temperaturas afecta hoxe a Valdeorras, litoral de Pontevedra, Sur de Lugo, Miño en Pontevedra e Sur de Ourense. O aviso chega a laranxa no caso do Miño en Ourense.
Para mañá, a alerta por fortes treboadas será amarelo en toda a provincia de Ourense, Interior de Pontevedra, Sur de Lugo e Miño en Pontevedra. Ademais, haberá tamén un aviso amarelo por fortes ventos do nordés, con forza 7 no litoral da Coruña.
Esta alerta está provocada pola presenza este sábado de masas de aire frío en capas altas da atmosfera que interactuarán coa calor en superficie destes días, xerando nubes e fortes tormentas con probable aparato eléctrico.
Aquí podes consultar o boletín de avisos de Meteogalicia
