Son as borrascas e cicloxéneses que van ser noticia nos vindeiros meses. Os titulares dos xornais falarán de Daniel, de Gloria, de Bernardo ou de Raquel, porque as axencias meteorolóxicas de Francia, Portugal e España acordaron xa a nomenclatura para os fenómenos atmosféricos de grande impacto que viviremos a partires deste outono.
A listaxe ten 21 nomes, que irán bautizando sucesivamente ás borrascas que conleven aviso laranxa ou vermello dende outubro no Atlántico e no Mediterráneo Occidental.
Cada tempada, dende hai tres anos, os servizos meteorolóxicos de España (Aemet), Francia (Météo- France) e Portugal (IPMA) publican a listaxe para dar nome a todas aquelas fortes depresións atmosféricas, que no periodo 2019/2020 serán: Amelie, Bernardo, Cecilia, Daniel, Elsa, Fabien, Gloria, Herve, Inés, Jorge, Karine, Leon, Myriam, Norberto, Odette, Prosper, Raquel, Simon, Teresa, Valentín e Wanda.
Na tempada anterior, os nomes chegaron ata Miguel, no número 13 da listaxe
Os avisos irán acompañados co nome cando se prevexan refachos máximos superiores aos 90, 100 e 110 quilómetros por hora en función das zonas, o cal non impide que veñan acompañadas de precipitacións. É dicir, só van levar nome aquelas que poidan producir un grande impacto en bens e persoas, aínda que non será necesario que experimenten un proceso de cicloxénese explosiva.
Segundo explica a Aemet, o feito de nomear ás borrascas con grande impacto favorece que a comunicación sexa máis efectiva ante un episodio adverso. O primeiro servizo meteorolóxico que emita un aviso de nivel laranxa ou vermello dará nome á borrasca, seguindo a lista preestablecida.
De todos os xeitos, é moi improbable que Simón, Valentín, Teresa ou Wanda cheguen a dar nome a unha borrasca. Porque na pasada tempada só foron nomeados 13 episodios, o derradeiro deles Miguel, unha cicloxénese que xa chegou a comezos do verán.
