A ciencia de Cíes ilustra Fitur

A natureza do arquipélago, eixe principal da oferta de Vigo na feira internacional de turismo que se celebra en Madrid

A natureza é dende hai tempo un dos grandes reclamos do turismo, da igual de onde sexa. Percíbese en Fitur, a gran feira internacional do turismo que se celebra estes días en Madrid, repleta de paisaxes excepcionais. Vigo, coas Cíes como mascarón de proa, non podía ser unha excepción. Co indiscutible argumento das illas que presiden a entrada da súa ría, o concello presentou este mércores na feira unha proposta turística repleta de ciencia; a ciencia dun arquipélago cun ecosistema único.

Na caseta de Turespaña, e acompañado pola ministra de Turismo, Reyes Maroto, o alcalde vigués, Abel Caballero, presentou unha oferta con dous grandes eixos: Cíes Patrimonio da Humanidade e o Nadal. Co slogan Vigo, el mundo en la ciudad, Caballero destacou a relevancia mundial das Illas Cíes, “que aparecen nos principais xornais de todo o planeta”.

Publicidade

Protagonismo científico

O protagonismo de Cíes na oferta de Vigo é un protagonismo científico, avalado polos traballos realizados pola candidatura das Illas Cíes ao Patrimonio Mundial da Unesco, reunidos nunha publicación presentada en xuño do pasado ano que recolle as investigacións realizadas por un equipo de máis de 20 investigadores nos últimos anos. O proxecto é froito do traballo de expertos das tres universidades galegas, do Instituto de Investigacións Mariñas do CSIC e do Centro Oceanográfico de Vigo, coordinados por Emilio Fernández, catedrático de Ecoloxía da Universidade de Vigo, e Carlota Barañano, oceanógrafa e membro do comité da candidatura.

As Illas Cíes, separadas do continente desde hai poucos miles de anos, sitúanse nun sistema de afloramento costeiro altamente produtivo, nunha zona de fronteira entre  biorrexións, o que permite ilustrar diversos procesos de grande interese ecolóxico e evolutivo que derivan da interacción entre sistema mariño e terrestre, e convérteas nun observatorio excepcional dos procesos de cambio ambiental de escala global que experimenta o planeta.

As Cíes son un observatorio excepcional dos procesos de cambio ambiental de escala global

O arquipélago sobresae como ecosistema pola súa conformación xeolóxica (cantís, praias, sistemas dunares ou lagoas), a diversidade e produtividade dos seus hábitats mariños, cunha presenza representativa da fauna e flora atlánticas, o interese pesqueiro das especies que habitan nas súas augas ou a relevancia dos cantís e demais enclaves para a nidificación de aves mariñas. Xunto a isto, a importancia histórica e cultural das Cíes conforma un territorio de gran valor patrimonial, destaca o libro.

A obra está auspiciada polo Concello de Vigo, co obxectivo de recoller todo o coñecemento científico existente publicado ata decembro de 2018 sobre as Illas Cíes, obtido a través da revisión bibliográfica exhaustiva e posterior análise da información recompilada por parte de especialistas de diversas disciplinas, e reforzando así o aval científico da candidatura á Unesco.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

O mapa da masa forestal mundial: Galicia perdeu o 34% de cobertura arbórea dende o ano 2000

A aplicación Global Forest Watch retrata en tempo real como están mudando as paisaxes naturais en todo o mundo

Un cento de persoas participan na Domus nun congreso científico para estudantes

Os catro gañadores do evento poderán gozar dunha estancia de dúas semanas xunto a grupos de investigación da UDC

O festival científico CinVigo encheu a Porta do Sol de ciencia e ilusión

Participaron máis de 220 alumnos de Secundaria, Bacharelato e FP que presentaron 58 proxectos na feira celebrada na cidade olívica

Os Prismas convocan unha categoría sobre océanos polo 25 aniversario do Aquarium

Os traballos deben presentarse antes do 3 de xuño. Os galardóns están impulsados polo Concello da Coruña e os Museos Científicos Coruñeses