A borrasca Beatriz non pasou. Quedou estable ao oeste de Irlanda e este xoves volverá á carga sobre Galicia, onde Meteogalicia activou novas alertas laranxas e amarelas por choivas intensas e fortes ventos.
O primeiro paso de Beatriz, durante a xornada do martes e madrugada do mércores, deixou en Viveiro, na costa de Lugo, refachos de vento de ata 140 quilómetros por hora, e en Cedeira superáronse os 130. De madrugada a situación mellorou, pero aínda así se superaron o 110 km/ h en Punta Candieira.
No mar a situación foi moi desapracible. Suspendeuse a conexión por barco entre Vigo e Cangas e a forza do océano deixou as habituais estampas das ondas rompendo con forza en localidades moi expostas como Malpica ou Caión. En canto a choiva, a zona máis afectada foi o Eixo Atlántico. En localidades como Lousame, Santa Comba ou Val do Dubra acumuláronse máis de 100 litros por metro cadrado ao longo do día.
Pero Beatriz non marchou. A borrasca volve este xoves con forza sobre Galicia. Meteogalicia xa activou as alertas. Está previsto un aviso laranxa en todo o litoral galego por ondas de entre 5 e 6 metros. A alerta será amarela por intensas precipitacións entre as seis e as nove da mañá no suroeste da Coruña e o litoral de Pontevedra. O vento será protagonista entre as seis e as doce da mañá. Espéranse fortes refachos de vento nas dúas provincias atlánticas e na Mariña, con refachos que poderían roldar os 70-80 quilómetros por hora.
O tempo continuará problemático o venres e durante a fin de semana, coa entrada de novas frontes que deixarán auga e vento sobre Galicia.
Aquí podes consultar
