Modo borrasca en Galicia para esta semana, cunha sucesión de avisos laranxas e amarelos de Meteogalicia por fortes choivas, intensos ventos e fenómenos costeiros no mar.
Este luns comeza con avisos amarelos na Mariña lucense por fortes ventos entre as 12.00 e as 18.00 horas, o mismo nivel de alerta que haberá no mar na provincia da Coruña e na Mariña lucense. O martes, o mar de fondo do noroeste levará ao aviso laranxa na Coruña, especialmente na Costa da Morte, pero tamén haberá aviso amarelo nas Rías Baixas.
A xornada máis complicada será a do mércores, cando haberá aviso laranxa por mar no litoral da Coruña, e amarelo no resto da costa galega. Pero o máis importante será o aviso amarelo por fortes choivas nas provincias de Pontevedra, A Coruña e na Mariña. Tamén hai alerta amarela por ventos, sobre todo no norte de Galicia.
A nova borrasca achegarase o mércores a Galicia deixando un novo episodio de intensas precipitacións, acompañadas de ventos fortes do sudoeste.
A choiva seguirá a ser protagonista en todo o país ata a vindeira semana, segundo os modelos numéricos de Meteogalicia.
Aquí podes consultar o Boletín de Avisos de Meteogalicia