A Axencia Europea de Seguridade Alimentaria emitiu o primeiro informe positivo en Europa sobre o uso dun aditivo alimentario para reducir as emisións de metano en ruminantes. O estudo, no que participa a Estación Experimental do Zaidín, Granada, instituto de investigación do Consello Superior de Investigacións Científicas (EEZ-CSIC), confirma que o uso do aditivo Bovaer non compromete a seguridade dos ruminantes nin do medio ambiente, ademais de non producir efectos prexudiciais sobre a dixestión ou a inxesta do animal.
A función deste composto molecular é inhibir a actividade dos microorganismos estomacais responsables das emisións de metano, conseguindo así unha redución das emisións do 30% sen afectar á dixestión nin saúde do animal. David R. Yáñez Ruiz, investigador da EEZ-CSIC e principal responsable deste estudo, afirma: “O desenvolvemento e aprobación deste aditivo supón un fito en investigación en nutrición animal, implicou a colaboración de múltiples grupos de investigación en Europa, EEUU, Canadá e Australia, e vai proporcionar unha ferramenta máis ao sector gandeiro para seguir avanzando en sistemas de produción de alimentos máis sostibles”.
O equipo da EEZ foi pioneiro en probar a efectividade da molécula en ensaios con animais e participou na identificación do seu mecanismo de acción, o que contribuíu a que sexa aprobado. O aditivo, que contén a molécula 3-nitrooxypropanol (3- NOP), responsable da actividade anti-metanoxénica, foi desenvolto durante os últimos 10 anos e o seu proceso de solicitude de autorización e rexistro comezou hai dous anos pola empresa DSM Nutritional Products.
Un dos gases máis relevantes en cambio climático
A razón pola que se pretende reducir as emisións de metano é porque se trata dun dos gases causantes do efecto invernadoiro. A gandeiría xera o 30% da produción de orixe antropoxénica. No recente cume do clima COP-26 de Glasgow, a Unión Europea e Estados Unidos impulsaron a nova alianza de 100 países que buscan rebaixar as emisións de metano nun 30% para 2030.
Os efectos positivos da redución de emisións deste gas terían resultados máis inmediatos en comparación a outros gases como o dióxido de carbono, xa que a súa vida media na atmosfera é de 12 anos aproximadamente. Isto é importante porque unha soa tonelada de metano na terra ten 56 veces máis capacidade de quecemento global que unha tonelada de CO2 nun horizonte de 20 anos.
