O Diario Oficial de Galicia publicou onte a licitación dos traballos para a eliminación de varias especies exóticas invasoras de flora e fauna. Entre elas atópase o mapache (Procyon lotor L), mamífero carnívoro de orixe americana, pero que foi avistado nos últimos anos no entorno dos ríos Miño, Parga, Landra, Támoga, Eume e Tambre.
A orixe da presenza do mapache en Galicia podería ter a súa orixe nunha fuga de varios exemplares acontecida en 2010 no parque zoolóxico de Marcelle, en Outeiro de Rei (Lugo), debido aos danos causados por unha cicloxénese, segundo informou no seu momento La Voz de Galicia.
A raíz daquel suceso, estes animais, que adoitan habitar preto da auga, comezaron a reproducirse a gran velocidade, causando importantes danos nas especies do curso do río Miño e alterando o ecosistema. A Xunta puxo entón en marcha unha campaña na que se capturaron máis de 30 mapaches, pero o problema no se atallou por completo. Así, nos últimos anos detectáronse exemplares en varios puntos das provincias da Coruña e Lugo.
Con esta nova campaña, a Consellería de Medio Ambiente pretende garantir que non queden exemplares en estado silvestre.
O plan tamén se centrará na Fallopia japonica, unha das especies invasoras máis perigosas
Amais do mapache, os traballos que foron licitados por un importe de case 370.000 euros, centraranse na eliminación da Fallopia japonica, unha planta incluída no Catálogo español de especies exóticas invasoras e considerada pola Unión Internacional para a Conservación da Natureza (UICN) como unha das 100 especies invasoras máis perigosas. As intervencións estarán centradas nos concellos de Vedra, Boqueixón, Trazo, Aranga e Oleiros.
Unha parte do orzamento tamén se destinará ao control e/ou erradicación de Cortaderia sellona, coñecida coloquialmente como plumacho da Pampa, Carpobrotus sp e Agave americana (unlla de gato) en varios espazos naturais costeiros.
