Os bombeiros tiveron que actuar en Arteixo polos sinistros provocados polo vento.

Neve, sinistros, ventos de 120 km/h, ondadas e un ‘tornado’

A forte borrasca deixa numerosos incidentes en Galicia con caída de árbores, cortes de luz, accidentes e desvío de voos

A forte borrasca propia do inverno deixa no medio do outono unha pegada de incidentes en toda Galicia, provocados polas intensas nevaradas, a sarabia, un ‘tornado‘ que arrasou o tendido eléctrico en Arteixo, caída de árbores, cortes de estradas e desvío de voos nos aeroportos galegos.

O suceso máis controvertido foi un suposto ‘tornado’ rexistrado en Arteixo, que non foi confirmado por Meteogalicia. Un veciño gravou imaxes que amosan o forte vento na localidade, donde se produciron caídas de árbores e cables da iluminación pública. Segundo informaron os bombeiros da localidade, o tornado iniciouse nas inmediacións da autovía AG-55, ao seu paso pola parroquia de Paiosaco, e avanzou ata a AC-552, onde provocou cortes de tráfico pola caída de árbores.

Unha árbore de grande porte caeu nos xardíns das Avenidas, no centro de Vigo.

Ademais de varias árbores, o tornado tamén provocou a caída do tendido eléctrico no lugar de Santaia de Arriba, tamén en Arteixo, sen que se rexistrasen danos persoais.

O 112 Galicia informou de que recibiu o aviso sobre as 11,45 horas, tras o que mobilizou á Policía Local, a Protección Civil de Arteixo e aos Bombeiros de Arteixo.

Unha riada de sarabia en Arteixo.

Tras o paso dunha fronte fría durante a noite, que provocou un notable descenso nos termómetros, Galicia sufriu durante todo o día o paso dunha intensa borrasca con aire xélido, ante o que se activou unha alerta vermella por fenómenos costeiros adversos en toda a comunidade. Houbo ademais avisos amarelos e laranxas por choivas intensas e por nevaradas nas montañas de Lugo e Ourense.

A neve en Campa da Braña, nos Ancares, onde se acumulou máis dun metro.

As ondas chegaron aos dez metros no litoral da Coruña, con 10,4 de alto en Cabo Vilán e 9,90 en Punta Langosteira, segundo os datos de Portos do Estado. A forza da borrasca chegou combinada coas mareas vivas, o que fixo que Proteción Civil activase unha alerta por perigo de asolagamentos na Coruña e nas Rías Baixas.

Houbo tamén problemas nas estradas, especialmente pola neve nas montañas de Ourense e Lugo. Houbo camións retidos na A-6 á altura de Gomeán e Pedrafita e cortes na A-52 en Zamora.

A ondada chegou aos 10 metros de altura na costa norte de Galicia.

Tamén se sucederon os voos desviados en Alvedro e Peinador. Un voo de Air Europa que viña de Madrid a Vigo non puido aterrar na cidade olívica polo mal tempo e volveu par a Madrid, segundo informou AENA. Na Coruña o voo de Vueling procedente de Barcelona, coa chegada prevista ás 11.15 horas, tivo que ser desviado a Lavacolla por mor dos fortes refachos de vento. A saída prevista dese avión cara á cidade condal realizouse desde o aeródromo santiagués. Outros dous voos foron tamén desviados nos aeroportos galegos.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.