O Servizo de Cambio Climático de Copernicus (C3S) anticipa que 2023 será moi probablemente o ano máis caloroso xamais rexistrado. Esta estimación provén dos rexistros tomados ao longo de todo o ano por este centro implementado a través do Centro Europeo de Previsións Meteorolóxicas a Prazo Medio en representación da Comisión Europea, e que inclúen os datos do mes de novembro.

Nos seus boletíns mensuais sobre o clima, Copernicus informa das variacións rexistradas na temperatura do aire en superficie, a cobertura de xeo mariño e as variables hidrolóxicas a escala mundial. Todos os resultados se basean en análises xeradas por computador e segundo o conxunto de datos do ERA5 que utilizan miles de millóns de medicións provenientes de satélites, buques, aeronaves e estacións meteorolóxicas en todo o mundo.

Publicidade

Así, entre os aspectos destacados sobre a temperatura do aire en superficie en novembro de 2023, indícase que o de 2023 foi o novembro máis cálido desde que hai rexistros en todo o mundo, cunha temperatura media do aire en superficie de 14,22 °C (0,85 °C por encima da media de 1991-2020 para ese mes).

Ademais, o mes pasado foi 1,75 ºC máis cálido que a media estimada para un mes de novembro de 1850-1900, o período de referencia preindustrial. En tanto, a anomalía da temperatura mundial en novembro de 2023 foi igual á de outubro de 2023.

A temperatura media da superficie do mar durante o mes pasado (entre as coordenadas 60°S-60°N) foi a máis alta rexistrada para novembro con 0,25°C máis que o segundo novembro máis cálido, o de 2015.

Un outono de récord

No que vai de ano (de xaneiro a novembro) a temperatura media a nivel mundial de 2023 foi a máis alta desde que hai rexistros: 1,46 ºC por encima da media da era preindustrial e 0,13 ºC superior ao período de once meses equivalente de 2016, o ano natural máis cálido rexistrado ata o de agora.

En canto ao outono boreal de 2023 foi o máis cálido rexistrado en todo o mundo, xa que a temperatura media se situou en 15,30 °C (foi 0,88 ºC superior á media). E a temperatura media europea de setembro a novembro foi de 10,96 °C, é dicir, 1,43 °C por encima da media. Isto converteu ao outono boreal de 2023 no segundo máis cálido xamais rexistrado, só 0,03°C máis frío que o outono de 2020.

Samantha Burgess, directora adxunta do Servizo de Cambio Climático de Copernicus (C3S), sinalou que, en seis meses de 2023, “se bateron récords e en dous das estacións, tamén”. As extraordinarias temperaturas mundiais de novembro, “que tivo dous días con temperaturas 2 ºC por encima da temperatura preindustrial, converten a 2023 no ano máis cálido da historia desde que existen rexistros”, engadiu.

Pola súa banda, o director do C3S, Carlo Buontempo, indicou que “mentres sigan aumentando as concentracións de gases de efecto invernadoiro, non cabe esperar resultados distintos aos que vimos este ano, xa que “a temperatura seguirá subindo”. Tamén aumentarán, no seu criterio, “os impactos das ondas de calor e as secas”.

Para Buontempo, “unha maneira eficaz de xestionar os nosos riscos climáticos é alcanzando a neutralidade nas emisións de carbono canto antes”.

Desxeo, choivas excesivas ou seca

Entre os aspectos destacados sobre o xeo mariño en novembro de 2023, o informe destaca que a extensión do xeo mariño no Ártico alcanzou o seu oitavo nivel máis baixo para un mes de novembro, un 4 % máis baixo que a media.

A extensión do xeo mariño da Antártida foi a segunda máis baixa para un mes de novembro, un 9 % por baixo da media, tras alcanzar niveis mínimos históricos para a época do ano con amplas marxes durante seis meses consecutivos.

Acerca das variables hidrolóxicas deste último mes rexistrado en 2023, os científicos sinalan que, durante novembro rexistráronse máis precipitacións que a media na maior parte de Europa: a borrasca Ciarán afectou a moitas rexións, entre elas Italia, e provocou fortes precipitacións e inundacións.

Ao mesmo tempo, constatáronse condicións máis secas que a media en varias zonas de Estados Unidos e de Asia central e oriental, así como na maior parte do hemisferio sur extratropical, que foron especialmente pronunciadas en Sudamérica.

A situación dos ríos

Sobre as variables hidrolóxicas no outono boreal de 2023, o boletín informa que se rexistraron precipitacións superiores á media nunha ampla franxa latitudinal de Europa, así como no Reino Unido e Irlanda, na maior parte de Escandinavia e en Turquía. Durante a estación, varias borrascas provocaron choivas e inundacións xeneralizadas a escala local.

Con todo, no mesmo período, houbo condicións máis secas que a media en gran parte de América do Norte, na zona central e o extremo oriental de Asia, así como na maior parte de Australia, Sudamérica e o sur de África.

Entre as rexións extratropicais con máis precipitación da habitual cóntanse o noroeste do mar Caspio e algunhas partes de Rusia, o extremo oriental de China, o sur de Brasil, Chile e o Corno de África.