Fas ciencia na escola? Participa no premio Luís Freire!

Os Museos Científicos Coruñeses e o Concello da Coruña convocan un ano máis o Premio Luís Freire de Investigación Científica na Escola, en colaboración coa Asociación de Amigos da Casa das Ciencias. Pretende fomentar o interese pola ciencia e a formación en actitudes científicas, e premia as investigacións e proxectos que se distinguen pola súa orixinalidade e rigor, e que demostren sentido crítico, curiosidade e constancia.

Con motivo especial do 20 aniversario da convocatoria premiaranse todas as inscricións que finalicen a súa investigación e presenten a súa memoria antes do 1 de marzo de 2019. As aulas de quen participen serán invitadas a visitar gratuitamente durante un día os tres museos científicos, complementándoa coas actividades que desexen realizar en cada un deles en función da oferta dispoñible.

Publicidade

Dúas modalidades

A participación está aberta en dúas modalidades. A primera dedicada a proxectos de investigación científica realizados polo profesorado nas aulas de Educación Primaria. A segunda para alumnado de Educación Secundaria que desenvolvan investigacións científicas.

O alumnado e profesorado que desexe participar ten ata o próximo 28 de decembro para enviar as súas propostas. Posteriormente, terán 3 meses para desenvolver os seus traballos. A fase final terá lugar na Domus o 30 de marzo de 2019, e a ela concorrerán os tres mellores traballos seleccionados en cada modalidade.

O profesorado de Educación Primaria da área metropolitana da cidade coruñesa poderá solicitar a visita á aula dun técnico dos Museos Científicos para impartir unha charla sobre como realizar unha investigación científica e os valores educativos que pode proporcionar ao alumnado. Para reservar unha data será necesario solicitala na dirección premioluisfreire@casaciencias.org

Os premios para os/as finalistas comprenden, ademáis de diversos aparellos, a presentación dos traballos gañadores nas dúas modalidades na feira científica Galiciencia, Ourense, en maio de 2019.

Luís Freire

Luis Freire naceu na Coruña en 1914. Aos 3 anos trasladouse coa súa familia a Vilalba, onde vivían os seus avós maternos. Asistiu á escola pública, unha escola con pouco alumnado e cunhas mestras excepcionais que deixarían unha profunda pegada na súa maneira de aprender e de ensinar. Esta estancia en Vilalba converteuno, en palabras do escritor e profesor Alonso Montero, nun «aristócrata de aldea».

Con 12 anos, regresou á cidade da Coruña e comezou a traballar e a estudar por libre os catro cursos do bacharelato elemental que aprobou en só dous anos. Superada a reválida decidiu facerse practicante e continuar os estudos de bacharelato superior.

Á vez que desenvolvía a súa actividade profesional impartía clases particulares de latín, de grego, de literatura ou de matemáticas, tanto en niveis secundarios como universitarios. E comezou a practicar unha afección á que dedicaría toda a súa vida: o estudo de insectos, arañas e plantas.

Aos 57 anos trasladouse a Santiago de Compostela para estudar Ciencias Biolóxicas. Acabou a carreira en catro anos e licenciouse en 1975, e a continuación realizou a tese de licenciatura e a tese doutoral. Durante este tempo impartiu clases de Botánica na facultade e codirixiu cinco teses de licenciatura sobre flora e micoloxía de Galicia.

En 1981 defendeu a súa tese doutoral sobre fungos “Macromicetos da Selva Negra”. A partir de entón, a micoloxía converteuse na súa principal liña de investigación. Publicou máis de 40 artigos, 4 libros, participou no medio cento de congresos e dirixiu 8 teses de licenciatura e 2 teses doutoral sobre o tema.

Luis Freire foi membro fundador da Sociedade Galega de Historia Natural, do Grupo Botánico Galego, do Grupo Micolóxico Galego e da Asociación de Amigos da Casa das Ciencias.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

GCiencia abre o ciclo de faladoiros "Os mundos científicos de Vigo"

Os relatorios darán comezo o luns no edificio Redeiras cunha charla introdutoria que leva por título 'A divulgación científica en Galicia'

“Biosfera escura”: o novo programa do planetario da Casa das Ciencias

O audiovisual dirixido por Javier Bollaín representará unha viaxe dende a Terra ata os confíns da Vía Láctea

Entrada gratuíta no Día dos Museos para a Domus, Casa das Ciencias e Aquarium

Os tres recintos estarán abertos ao público xeral dende as 10 horas ata as 19 horas do sábado, cunha ampla oferta de actividades

Intelixencia artificial para detectar TDAH nas aulas e outros proxectos de Galiciencia 2024

A feira científica reúne un centenar de traballos de alumnado de Secundaria, Bacharelato, FP e Primaria de toda a comunidade