Únete á nosa canle de Whatsapp
Comunicar a ciencia con rigor e calidade. Ese é un dos principais obxectivos da Asociación Galega de Comunicación de Cultura Científica e Tecnolóxica (Divulgacción), que este sábado 23 de xullo celebra o seu encontro anual. O cartel do evento está cheo de actividades variadas, entre as que salientan obradoiros, charlas de expertos da comunicación científica, presentacións de libros e un panel de experiencias compartidas. A reunión, que se celebrará ao longo de todo o día, ofrece un programa matinal exclusivo para os seus socios. Porén, a partir das 17.30 horas, as actividades serán abertas para todo o público. Este ano, será a sala Leonardo Da Vinci, da Domus da Coruña, a que acolla o evento.
Programa para socios
Máis polo miúdo, o encontro anual de Divulgacción arrancará as 10 horas cun obradoiro para xogar e explorar coas mans. O taller estará protagonizado polos kits de investigación educativa de Xuvenciencia, para os que é preciso inscribirse nesta ligazón. Cando remate esta actividade, arredor das 11.30 horas, a investigadora Catarina Costa Moura falará das diferentes accións de comunicación científica que se levan a cabo no Laboratorio Ibérico de Nanotecnoloxía (INL), tanto para adultos como para os máis novos e, concretamente, coas escolas e residencias de artistas. Así mesmo, tamén estarán presentes o xornalista científico Antonio Martínez Ron e o comunicador Javier Peláez, ambos fundadores de Naukas, unha plataforma de divulgación. Eles tamén impartirán unha charla onde explicarán como se pode falar de ciencia e, sobre todo, como se pode abrir este ámbito ao público.
Para rematar a mañá, entre as 13 e as 14 horas, hai programado un panel de experiencias compartidas. Primeiro falará o profesor Ricardo Paredes, explicando como é iso de ser docente de física nos Estados Unidos. Despois tomará o relevo Manuel Vicente, que procederá a presentar os resultados de Voces de Ciencia. A continuación, Wajih Al-Soufi e Mercedes Novo falarán das G-Night de 2021 e 2022, así como dos Campus de Verán que programa XuvenCiencia durante estes meses. Despois, o xornalista Manuel Rey falará de Pioneiras da ciencia en Galicia, un libro do que é coautor e no que se analizan as figuras de 25 mulleres galegas ou estreitamente vinculadas á ciencia do país, como Isabel Zendal, Ramona Vaamonde e Ana María Prieto Díaz. Xa para finalizar o panel, Joana Magalhaes abordará a experiencia de Newsera, centrada na ciencia cidadá e na comunicación da ciencia.
Programa aberto ao público
Finalmente, o evento abrirá as súas portas ao público xeral ao longo da tarde. A primeira actividade, que se celebrará a partir das 17.30 horas, terá como protagonistas ás divulgadoras Eva Cabanelas e Andrea Muras, que presentarán o concurso de monólogos científicos en galego Ciencia Calidade. Despois do seu remate, dende as 17.45 ás 19.45 horas farase a presentación de dous libros. Un deles, Algo Nuevo en los Cielos, do xornalista Antonio Martínez Ron. O outro, Planeta Océano, de Javier Peláez. A continuación, e xa para rematar a xornada, haberá un coloquio cos autores das obras e un posto de venta de libros.
