UDCiencia d+i, grupo de divulgación científica e innovación docente da Universidade da Coruña, en colaboración cos Museos Científicos Coruñeses, organiza para o sábado 1 de abril varios talleres experimentais sobre a vida mariña atendidos por profesorado e alumnado da Universidade da Coruña.
Será unha oportunidade para descubrir e aprender ciencia participando en diversos experimentos, xogos e actividades. Son os seguintes:
Publicidade
- Os peixes: farase unha disección dun peixe para dar resposta a estas preguntas: como se adaptan os peixes peláxicos para vivir na columna de auga?, cales son esas adaptacións?, nadan?, flotan?
- Os cefalópodos: estes moluscos desenvolveron características biolóxicas que os fan particularmente interesantes: non teñen cuncha externa, son capaces de camuflarse, teñen unha visión moi ben deseñada, e un patrón de pigmentación moi variado. A través da disección dun destes animais explicaranse todas estas características.
- As pegadas da vida: os seres vivos ás veces deixan evidencias físicas ou químicas do seu paso pola vida. Explicarase como se forman estas pegadas e faranse réplicas dalgúns dos fósiles coñecidos analizando e observando as súas características anatómicas e biolóxicas.
- Baixo presión!: o concepto de presión é fundamental para entender moitos procesos naturais e tecnolóxicos. Presentaranse experimentos nos que se xogará coa presión atmosférica ou hidrostática para transvasar ou aspirar auga ou accionar pontes levadizos.
A participación nos talleres será libre para todas as persoas que visiten o Aquarium Finisterrae abonando a entrada correspondente.
