Os Museos Científicos Coruñeses organizan, para as vacacións de Nadal, unha actividade dirixida a todos os públicos e inspirada nas “escape rooms” que acadaron sona nos últimos anos. Baixo o nome de “Misión Secreta”, as persoas participantes terán que atopar pistas ocultas ou resolver situacións inesperadas para conseguir finalizar a misión nun tempo límite. O obxectivo é atopar e salvar unha información crucial oculta no almacén do museo antes de que a atope unha fábrica secreta de replicantes.
A actividade, con 12 prazas por sesión, está dirixida a público familiar, con nenos e nenas a partir de 7 anos (sesións ás 17 e 18 h), que deben participar en compañía dunha persoa adulta, e terá lugar os días 21, 22, 28, 29 decembro de 2019 e o 3 e 4 de xaneiro de 2020.
Para participar é necesario preinscribirse este venres 13 de decembro a partir das 10 da mañá a través do formulario electrónico dispoñible nesta ligazón (en cada preinscrición poderán incluírse un máximo de 2 persoas). A actividade é gratuíta, debendo abonar só a entada correspondente ao museo.
