Cadeiras, pneumáticos, conos, cordas, vasos, nasas, carros da compra e ata un patinete. Todo isto estaba baixo as augas da Dársena da Coruña, e foi recollido na mañá deste domingo por un grupo de 100 persoas, entre os que estaban 80 mergulladores profesionais, na primeira gran limpeza de fondos mariños da Coruña, organizada ao abeiro do Festival Mar de Mares.
Os primeiros cálculos falan de máis de seis toneladas de lixo, concentrados nun espazo reducido arredor da Dársena, e recollidos en menos de dúas horas. A actividade contou tamén coa colaboración de voluntarios da Cruz Vermella, Garda Civil ou Bombeiros, entre outras entidades
A actividade foi ideada e liderada polo Centro de buceo Nauga, co obxectivo de contribuír ao medio ambiente e demostrar como o fondo do mar se ve afectado polos nosos residuos.
Limpeza de praias de Mar de Fábula
Tamén na Coruña, coincidindo co Día Internacional da Limpeza de Praias, a asociación Mar de Fábula organizou por segundo ano consecutivo unha xornada nos areais de Riazor e Orzán. Un grupo de 120 voluntarios foi quen de recoller ata 4.500 cabichas e dous sacos grandes de 100 litros cheos de plástico miúdo, ademais de latas e envases de vidro.
O Festival Mar de Mares
O encontro Mar de Mares, que se celebrou ao longo desta semana na cidade da Coruña, é un evento artístico, científico, educativo, lúdico e divulgativo de celebración e preservación do mar único en España. Nas súas cinco edicións anteriores acumula máis de 93.000 asistentes e máis de 200 actividades.
O festival conta co apoio de diversas institucións públicas, como o Concello da Coruña e a Consellería do Mar da Xunta de Galicia, pero tamén se alimenta do patrocinio privado de entidades como Signus (Sistema Integrado de Xestión de Pneumáticos Usados) e Gadis, entre outros, e conta coa colaboración de numerosas institucións que traballan o ámbito mariño na cidade e no resto de Galicia, como o Instituto Español de Oceanografía (IEO) da Coruña
