Un estudo realizado por investigadores do Centro Oceanográfico da Coruña en colaboración cos Centros Oceanográficos de Xixón e Canarias do Instituto Español de Oceanografía (IEO), a Universidade de Vigo, AZTI e a Universidade de California en Santa Cruz (Estados Unidos) analiza os patróns de variabilidade nas fontes de nutrientes e a complexidade da rede trófica planctónica (é dicir, o conxunto de relacións alimentarias que se dan entre as especies dun ecosistema, neste caso no plancto) a distintas escalas espaciais.
O estudo realizouse durante a circunnavegación Malaspina-2010 que percorreu as áreas centrais dos océanos Atlántico, Índico e Pacífico en dous buques oceanográficos: Sarmiento de Gamboa e BIO Hespérides. Recolléronse mostras de cinco clases de tamaño de plancto e tomáronse medidas ambientais como a temperatura, a salinidade e a concentración de nutrientes que se relacionaron coa biomasa e composición química do plancto. Como un indicador da orixe do alimento do plancto utilizouse a medida de isótopos estables de nitróxeno, unha análise que permite coñecer a procedencia da materia orgánica que forma parte dun organismo.
A expedición Malaspina deu a volta ao mundo no 2010 recollendo mostras
Os resultados obtidos suxiren unha elevada homoxeneidade xeográfica na transferencia neta de nitróxeno a niveis superiores da rede trófica ao considerar grandes escalas espaciais (máis de 5000 km). A análise dos modelos de tamaño revelouse como unha ferramenta práctica para estimar as fontes de nitróxeno inorgánico e a súa transferencia neta na rede trófica polo que esta ferramenta estatística poderá ser aplicada ao plancto doutras rexións.
Os resultados deste estudo forman parte de varios artigos e comunicacións científicas e están incluídos na tese doutoral de Carmen Mompeán de la Rosa titulada “Patróns macroecolóxicos de variabilidade trófica no plancto oceánico” e dirixida por Antonio Bode Riestra, que foi defendida con éxito na Universidade de Murcia o día 5 de febreiro de 2016. Esta tese realizouse grazas a unha bolsa-contrato de catro anos no Centro Oceanográfico da Coruña.
