O Laboratorio Europeo e Nacional de Referencia de Biotoxinas Mariñas de Vigo, que conta co asesoramento científico e técnico da universidade e está xestionado pola Axencia Española de Seguridade Alimentaria e Nutrición (AESAN), realiza desde o pasado 1 de xaneiro a clasificación e control europeo das áreas de produción de moluscos bivalvos, e desde a mesma data converteuse tamén en laboratorio de referencia da UE para o control de biotoxinas marinas.
As novas tarefas, que se engaden ás funcións encomendadas con anterioridade sobre metodoloxía e análise de biotoxinas mariñas, converten a este laboratorio nunha nova punta de lanza da investigación no sector en Galicia, que xa conta con organismos de referencia internacional, como o Intecmar, na análise técnica e sanitaria do medio mariño e os produtos do mar.
O centro, situado na Cidade Tecnolóxica (Citexvi) do campus da UVigo, foi visitado o luns pola ministra de Sanidade, Consumo e Benestar, María Luisa Carcedo. No percorrido polo laboratorio, a ministra explicou que agora tamén se elaboran en Vigo as guías para harmonizar métodos de clasificación de zonas de produción.
Despois do Brexit
Estas tarefas eran realizadas ata agora polo laboratorio de referencia para o seguimento dos contaminantes virais e bacteriolóxicos de moluscos bivalvos, ubicado no Reino Unido. Porén, debido ao Brexit, as funcións deste laboratorio foron distribuídas entre varios centros de análise na Unión Europea, segundo explica o Ministerio de Sanidade.
Un dos elixidos foi o de Vigo, “dada a alta consideración que a Comisión Europea ten neste laboratorio xestionado pola AESAN”, segundo o Goberno español. Alén desta tarefa a nivel comunitario, o centro vigués é tamén referencia nacional na análise de biotoxinas mariñas, “exercendo un labor de coordinación das actividades dos laboratorios oficiais de control designados en España, a fin de harmonizar e mellorar os métodos de análise, ensaio ou diagnóstico”.
