Venres 29 Marzo 2024

Enxeñeiros de Lugo idean portos autosuficientes con fontes renovables

Investigadores da Escola Politécnica Superior de Enxeñaría da USC participan nun proxecto europeo dotado con 2,6 millóns de euros

O Grupo Integrado de Enxeñaría Civil e Xeomática (Cigeo) do Departamento de Enxeñaría Agroforestal da Escola Politécnica Superior de Enxeñaría (EPSE) do campus de Lugo da USC traballa a prol da autosuficiencia enerxética dos enclaves portuarios marítimos no marco do programa Ports Towards Energy Self-Sufficiency (Portos), un proxecto dotado dun financiamento global de 2,6 millóns de euros e incluído no programa Interreg Espazo Atlántico, no que a USC participa como integrante dun consorcio no que están representadas 18 entidades e institucións europeas da rexión atlántica.

Os portos marítimos son un dos motores fundamentais da economía. Para o seu axeitado funcionamento precísase dispoñer de grandes infraestruturas e instalacións, que requiren un elevado subministro de enerxía e son fonte de polución. Estes dous problemas ambientais poderían solucionarse ou cando menos mitigar o seu impacto co co uso de enerxías renovables.

Publicidade

O proxecto Portos afonda no aproveitamento da enerxía renovable de orixe mariña que se pode obter para abastecer a estas instalacións

Así, segundo informa a USC, o proxecto Portos xorde precisamente da oportunidade de aproveitamento de enerxías renovables advertidas nas zonas costeiras, localizacións nas que existe unha confluencia entre o elevado consumo e a gran dispoñibilidade de enerxía renovable mariña. Daquela, este o programa Portos pretende avaliar, desenvolver e promocionar o uso integrado destes recursos enerxéticos renovables en enclaves portuarios, e especialmente as enerxías renovables mariñas, co obxectivo de acadar a súa autosuficiencia enerxética, a fin de establecer así unha folla de ruta cara un sector máis competitivo.

O cometido do grupo Cigeo da EPS de Enxeñaría do campus de Lugo da USC neste proxecto europeo, no que tamén participan centros de I+D+i, empresas e autoridades portuarias do Reino Unido, Francia, Irlanda, Portugal e España, non é menor, xa que desempeña un papel fundamental no desenvolvemento do proxecto Portos, segundo indicou o profesor Rodrigo Carballo, quen lidera a implicación da USC neste programa, no que tamén teñen unha participación directa Iván López Moreira e Mateo Fouz Varela, entre outros investigadores.

Respecto das accións encomendadas ao grupo Cigeo da USC no proxecto Portos, Rodrigo Carballo indicou que “somos o equipo responsable de, entre outros aspectos, realizar a avaliación integrada das diferentes formas de enerxía nos portos participantes, así como da realización de ensaios experimentais a escala na canle de ondas e correntes de que dispón a Escola Politécnica Superior de Enxeñaría do campus de Lugo”.

“Temos moito traballo por diante”, engade Carballo, para, de seguido, explicar que, a partir das actividades previstas neste proxecto, o noso grupo é o encargado de determinar os emprazamentos e as tecnoloxías máis acaídas para o aproveitamento da enerxía das ondas e das correntes. As tecnoloxías seleccionadas serán optimizadas para as condicións de clima marítimo existentes nas localizacións de interese por medio dos ensaios que se realizarán nas instalacións da EPSE, dixo Carballo.

Alén da participación no programa europeo Portos, un proxecto Interreg Espazo Atlántico que vén de botar a andar no mes de abril, o grupo Cigeo da USC conta cunha ampla experiencia na análise do aproveitamento das enerxías renovables mariñas. De feito, este grupo ten participado en numerosos proxectos de investigación tanto a nivel internacional, nacional coma rexional, no marco dos cales realizou máis de 50 publicacións en revistas internacionais de impacto.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Gciencia celebra o Día da Lingua Materna cun relatorio sobre a divulgación en galego

A xornalista Laura Filloy abordou a importancia de trasladar o coñecemento científico á sociedade nun acto celebrado no Campus de Lugo da USC

Atopado o talón de Aquiles da rata toupa, a praga que azouta a montaña luguesa

O estudo do órgano vomeronasal deste mamífero subterráneo avala o uso de químicos para diminuír a súa poboación e frear o seu impacto na agricultura

Como captar enerxía das ondas do mar e sobrevivir no intento

A enerxía que se extrae das ondas é unha das grandes apostas con respecto á investigación de enerxías renovables en Galicia, mais os dispositivos utilizados deben superar varias dificultades

Sete accións que poderían salvar mil millóns de vidas de aquí a 2100

Segundo un estudo recente, é probable que mil millóns de persoas morran de maneira prematura a finais de século a causa do cambio climático